«Halk hakydasy» ýadygärlikler toplumyna gezelenç guraldy
2024-nji ýylyň 3-nji maýynda Türkmenistanyň Daşary işler ministrliginiň Halkara gatnaşyklary institutynyň garamagynda hereket edýän Ýaş diplomatlaryň mekdebi tarapyndan paýtagtymyzyň gözel künjeginde ýerleşýän «Halk hakydasy» ýadygärlikler toplumyna gezelenç guraldy. Gezelenje institutymyzyň talyp ýaşlary we Ýaş diplomatlaryň mekdebiniň işjeň agzalary bolan mekdep okuwçylary gatnaşdylar. Gezelenjiň dowamynda talyplar we mekdep okuwçylary Watan ugrunda şirin janlaryny gurban eden gerçekleriň, 1941-1945-nji ýyllaryň Beýik Watançylyk urşunda hem-de 1948-nji ýylyň 6-njy oktýabrynda bolup geçen Aşgabat ýer titremesinde wepat bolanlaryň hatyrasyna bagyşlanyp gurlan ýadygärlikleri ýakyndan synladylar. Gezelenje gatnaşyjylar «Halk hakydasy» ýadygärlikler toplumynyň çäginde gurlan «Watan mukaddesligi» muzeýine hem baryp gördüler. Şeýle hem gezelenjiň çäginde ylmy seminar geçirilip, onuň dowamynda institutymyzyň mugallymlary gezelenje gatnaşyjylara türkmen halkynyň şöhratly taryhy, geljekki nesilleriň bagtyýar durmuşda ýaşamaklary üçin şirin janlaryny gurban eden gahrymanlar barada gürrüň berdiler.
Şeýle gezelençleriň yzygiderli guralmagy türkmen diplomatiýasynyň geljekki wekilleri bolan Ýaş diplomatlaryň mekdebiniň agzalarynyň halkymyzyň bäş müň ýyllyk şöhratly taryhyny içgin öwrenmekligine, watansöýüji, ilhalar ynsanlar bolup ýetişmeklerine uly goşant goşýar.
Gezelenjiň ahyrynda oňa gatnaşyjylar okamaga, öwrenmäge, döretmäge giň mümkinçilikler döredip berýän türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza alkyş sözlerini aýtdylar.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.