Habar beriş serişdeleriniň erkinligine degişli onlaýn maslahat geçirildi
2022-nji ýylyň 16-17-nji maýy aralygynda Türkmenistanyň Daşary işler ministrliginiň Halkara gatnaşyklary institutynda Ýewropada Howpsuzlyk we Hyzmatdaşlyk Guramasynyň (ÝHHG) Aşgabatdaky Merkeziniň guramagynda “Türkmenistanda adam hukuklary boýunça 2021-2025-nji ýyllar üçin Hereketleriň milli Meýilnamasynyň habar beriş serişdeleriniň erkinligine degişli bentlerini ýerine ýetirmekde goldaw bermek” boýunça taslamanyň çäklerinde “Pikir we pikir azatlygyny goraýan kanunlary we amallary gowulandyrmak” atly tema boýunça sanly wideoaragatnaşyk arkaly iki günlük onlaýn okuw maslahaty geçirildi.
Bu onlaýn maslahata ÝHHG-nyň Aşgabatdaky Merkeziniň Maksatnama utgaşdyryjysy Rune Kastberg, guramanyň Aşgabatdaky wekilleri, moldowaly bilermen jenap Ion Bunduki we gruziýaly bilermen jenap Mamuka Anguladze, şeýle hem Türkmenistanyň Daşary işler ministrliginiň wekilleri, ýurdumyzyň habar beriş serişdeleriniň wekilleri, hukuk goraýjy edaralaryň işgärleri we ýurdumyzyň ýokary okuw mekdepleriniň mugallymlary gatnaşdylar. Halkara bilermenler metbugat azatlygy we söz azatlygy bilen baglanyşykly düzgünleriň ýerine ýetirilmegini goldamak üçin tejribe alyşmak maksady bilen birnäçe sorag-jogaplar alşyldy.
“Türkmenistanda adam hukuklary boýunça 2021-2025-nji ýyllar üçin Hereketleriň milli Meýilnamasynyň habar beriş serişdeleriniň erkinligine degişli bentlerini ýerine ýetirmekde goldaw bermek” atly geçirilýän bu okuw maslahatynyň başynda gatnaşyjylary iş tertibi bilen tanyşdyryldy. Iki günüň dowamynda geçirilen masalahatda žurnalistleriň borçlarynyň halkara ülňüleri, söz azatlygynyň Konstitusiýada berkidilişi, şeýle-de maglumat elýeterliligi, adam hukuklaryny goramak we pugtalandyrmak, awtorlyk hukugy barada giňişleýin düşünje berildi.
Okuw maslahatynyň ahyrynda, maslahata gatnaşyjylar ýurdumyzyň Ýewropada Howpsuzlyk we Hyzmatdaşlyk Guramasy bilen gatnaşyklaryň has-da artdyrylýandygyny we mundan beýläk-de ösdüriljekdigi dogrusynda belläp geçdiler.
Dürli BALLYÝEWA,
Türkmensitanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme
hukuk öwreniş kafedrasynyň
uly mugallymy.
Şeýle hem bu barada okap bilersiňiz: