GÖNI WIDEOARAGATNAŞYK ARKALY DUŞUŞYK GEÇIRILDI
2024-nji ýylyň 29-njy noýabrynda türkmen diplomatiýasynyň milli mekdebi bolan Türkmenistanyň Daşary işler ministrliginiň Halkara gatnaşyklary institutynda Türkmenistan bilen Tunis Respublikasynyň arasynda diplomatik gatnaşyklaryň ýola goýulmagynyň 32 ýyllygy mynasybetli göni wideoaragatnaşyk arkaly duşuşyk geçirildi. Duşuşyga Türkmenistanyň Daşary işler ministrliginiň Halkara gatnaşyklary institutynyň we Tunis Respublikasynyň Halkara Diplomatik akademiýasynyň ýolbaşçylary, professor-mugallymlary we talyp ýaşlary gatnaşdylar.
Duşuşygyň başynda institutyň rektory G. Ýusupowa çykyş edip, iki ýokary okuw mekdebiniň arasyndaky hyzmatdaşlyk, alnyp barylýan türkmen-tunis gatnaşyklary, dana şahyr Magtymguly Pyragynyň ömri, döredijiligi, umumadamzat ähmiýetli bitiren işleri barada belläp geçdi.
Göni wideoaragatnaşyk arkaly duşuşygyň dowamynda tunis tarapdan Tunis Respublikasynyň Halkara Diplomatik akademiýasynyň Baş müdiri R.Dridi hem-de Tunis Respublikasynyň Daşary işler ministrliginiň Aziýa Ösüş bölüminiň Baş müdiri S.Ghariani çykyş etdiler. Çykyşlarynyň dowamynda Türkmenistan bilen Tunis Respublikasynyň arasyndaky syýasy-diplomatik, söwda-ykdysady, medeni-ynsanperwer ugurlar boýunça ýetilen sepgitler we durmuşa geçirilýän işler barada gürrüň berdiler.
Duşuşygyň ahyrynda iki dostlukly ýurduň ýokary okuw mekdepleriniň özara gatnaşyklarynyň anyk ugurlary görkezildi we hyzmatdaşlyk etmegiň geljegine garaldy. Şeýle duşuşyklaryň yzygiderli geçirilmegi ikitaraplaýyn gatnaşyklary berkitmekde, bilim ulgamyny has-da ösdürmekde giň mümkinçilikleri döredýär.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.