Garaşsyzlygymyzyň 34 ýyllygyna bagyşlanan ylmy-amaly maslahat
2025-nji ýylyň 23-nji sentýabrynda Türkmenistanyň Daşary işler ministrliginiň Halkara gatnaşyklary institutynda mukaddes Garaşsyzlygymyzyň şanly 34 ýyllygy mynasybetli «Garaşsyz Türkmenistan — parahatçylygyň we ynanyşmagyň mekany» atly ylmy-amaly maslahat geçirildi. Oňa ylmy jemgyýetçiligiň wekilleri, institutyň professor-mugallymlary, talyp ýaşlary, şeýle hem Türkmenistanyň Döwlet, hukuk we demokratiýa institutynyň hünärmenleri işjeň gatnaşdylar.
Ylmy-amaly maslahatyň umumy mejlisinde «Garaşsyzlygyň we Bitaraplygyň milli hukuk ulgamyndaky orny», «Garaşsyzlyk ýyllarynda milli telewideniýäniň ösüşi», «Garaşsyzlyk — türkmen halkynyň milli buýsanjy», «Garaşsyzlygy pugtalandyrmakda türkmen ýaşlarynyň orny» diýen temalar boýunça çykyşlar edildi. Onda Garaşsyzlygyň we Bitaraplygyň milli hukuk ulgamyndaky eýeleýän orny, ýurdumyzyň dürli ugurlardaky ösüşine itergi berýän güýçdügi barada aýratyn bellenildi. Şoňa görä-de, Garaşsyzlygy pugtalandyrmaga türkmen ýaşlarynyň goşýan mynasyp goşandy barada aýdylyp geçildi.
Umumy mejlisden soň, ylmy-amaly maslahat öz işini bölümçelerde dowam etdirdi. Onda çykyş edenler öz gyzyklanýan ylmy temalary barada giňişleýin gürrüň berdiler hem türkmen Garaşsyzlygynyň ýurdumyzda alnyp barylýan döwletli başlangyçlaryň badalgasydygyny aýratyn nygtadylar.
Ylmy-amaly maslahatyň ahyrynda oňa gatnaşyjylar bilimli, ukyply, döwrebap tehnologiýalardan baş çykarýan ruhubelent ýaşlary terbiýeläp ýetişdirmekde döredip berýän giň mümkinçilikleri üçin Gahryman Arkadagymyza, Arkadagly Gahryman Serdarymyza çäksiz minnetdarlygyny bildirdiler.
Oguldürli GELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.