Gahryman Arkadagymyzyň «Hakyda göwheri» atly kitabynyň azerbaýjan dilinde terjime edilmegi mynasybetli dabaraly maslahat geçirildi
2025-nji ýylyň 22-nji dekabrynda Türkmenistanyň Daşary işler ministrliginiň Halkara gatnaşyklary institutynda türkmen halkynyň Milli Lideri, Türkmenistanyň Halk maslahatynyň Başlygy Gurbanguly Berdimuhamedowyň «Hakyda göwheri» atly kitabynyň azerbaýjan diline terjime edilmegi mynasybetli dabaraly maslahat geçirildi. Dabaraly maslahata Türkmenistanyň Daşary işler ministrliginiň işgärleri, daşary ýurtlaryň we halkara guramalaryň Türkmenistandaky hemişelik wekilhanalarynyň ýolbaşçylary, institutymyzyň professor-mugallymlary, talyp ýaşlary gatnaşdylar.
Tanyşdyrylyş dabarasynyň dowamynda Türkmenistanyň Daşary işler ministriniň orunbasary Mähri Bäşimowa, Azerbaýjan Respublikasynyň Türkmenistandaky Adatdan daşary we Doly ygtyýarly ilçisi Gismat Gozalow, Türkmenistanyň Azerbaýjan Respublikasyndaky Adatdan daşary we Doly ygtyýarly ilçisi Gurbanmämmet Elýasow, Durmuş syýasaty baradaky komitetiniň başlygy, türkmen-azerbaýjan parlamentara dostluk toparynyň türkmen böleginiň başlygy Annamuhammet Sarjaýew, Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň alym kätibi, taryh ylymlarynyň kandidaty Kakajan Janbekow, Türkmenistanyň Daşary işler ministrliginiň Halkara gatnaşyklary institutynyň prorektory Begenç Mätliýew dagy çykyş etdiler. Olar öz çykyşlarynda «Hakyda göwheri» atly kitabyň azerbaýjan diline terjime edilmeginiň ähmiýeti barada belläp, azerbaýjan dilini bilýän okyjylara Gahryman Arkadagymyzyň döredijiligi, türkmen halkynyň taryhy bilen ýakyndan tanyşmaga ýardam etjekdigini aýratyn nygtadylar. Milli Liderimiziň ylmy-filosofik işleriniň we çeper eserleriniň ýaş nesiller, aýratyn hem, geljekki halkaraçy hünarmenler üçin gymmatly hazynadygyny bellediler. Milli Liderimiziň «Hakyda göwheri» atly eseri parahatçylyk söýjülige ýugrulan şöhratly taryhymyzy, milli diplomatiýamyzyň köklerini öwrenmekde gymmatly çeşmä öwrüler diýip, buýsanç bilen aýtdylar. Şeýle-de Gahryman Arkadagymyzyň «Hakyda göwheri» atly kitabynyň azerbaýjan dilinde terjime edilmegi mynasybetli Milli Liderimizi we Arkadagly Gahryman Serdarymyzy tüýs ýürekden gutladylar.
Mundan başga-da, tanyşdyrylyş dabarasynyň çäklerinde institutyň eýwanynda sergi ýaýbaňlandyrylyp, onda türkmen halkynyň amaly – haşam sungatynyň gymmatlyklaryna giň orun berlipdir. Bu bolsa tanyşdyrylyş dabarasyna gatnaşyjylarda uly gyzyklanma döretdi.
Güljahan AMANBERDIÝEWA,
Türkmenistanyň Daşary işler ministrliginiň
Halkara
gatnaşyklary institutynyň
Jemgyýeti öwreniş ylymlary kafedrasynyň mugallymy.
Bu barada şu ýerde hem okap bilersiňiz: