«Parahatçylygyň ýaş çaparlary»: IV möwsümiň II ýarym final oýny
2025-nji ýylyň 25-nji aprelinde Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» atly akyl-paýhas bäsleşiginiň «Bitarap Türkmenistanyň parahatçylygy dörediji diplomatiýasy: netijeli hyzmatdaşlygyň we durnukly ösüşiň ygtybarly guraly» atly umumy şygar astynda geçirilýän IV möwsüminiň II ýarym final oýny geçirildi. Akyl-paýhas bäsleşiginiň II ýarym final oýny «Türkmen halkynyň Milli Lideriniň parahatçylyk we ynanyşmak filosofiýasynyň halkara Bitaraplyk syýasatynyň kämilleşmeginde binýatlyk ähmiýeti» atly tema bagyşlanyldy.
«Parahatçylygyň ýaş çaparlary» atly akyl-paýhas bäsleşiginiň IV möwsüminiň II ýarym final oýnuna Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 12-nji synp okuwçysy Ýusupbaý Ýanabaýew, 11-nji synp okuwçysy Jeýhun Hojageldiýew, Aşgabat şäheriniň daşary ýurt dillerine ýöriteleşdirilen 89-njy orta mekdebiniň 12-nji synp okuwçysy Oguzhan Serdarow, Aşgabat şäheriniň daşary ýurt dillerini çuňlaşdyryp öwredýän 52-nji orta mekdebiniň 12-nji synp okuwçysy Resul Baýmyradow, Aşgabat şäheriniň Büzmeýin etrabynyň 98-nji orta mekdebiniň 12-nji synp okuwçysy Güýçmyrat Gulamow, Arkadag şäheriniň iňlis diline ýöriteleşdirilen 4-nji orta mekdebiniň 11-nji synp okuwçysy Jemal Hallyýewa, Mary welaýatynyň Sakarçäge etrabynyň Şatlyk şäherindäki takyk we tebigy ugurlaryna ýöriteleşdirilen 43-nji orta mekdebiniň 10-njy synp Nurmuhammet Ýazmuhammedow, Daşoguz welaýatynyň Daşoguz şäherindäki daşary ýurt dillerine ýöriteleşdirilen 24-nji orta mekdebiniň 12-nji synp okuwçysy Arzuw Şyhyýewa dagy gatnaşdylar.
Akyl-paýhas bäsleşiginiň IV möwsüminiň II ýarym final oýnuna «Pähimdarlar geňeşiniň» agzalary hökmünde Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew, Halkara ynsanperwer ylymlary we ösüş uniwersitetiniň Sosiologiýa we filosofiýa kafedrasynyň mugallymy Akbibi Ýazgeldiýewa, Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň mugallymy Yslam Şükürow dagy adalatly eminlik etdiler.
Bäsleşigiň netijelerine laýyklykda, Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçysy Jeýhun Hojageldiýew, Aşgabat şäheriniň daşary ýurt dillerini çuňlaşdyryp öwredýän 52-nji orta mekdebiniň 12-nji synp okuwçysy Resul Baýmyradow, Arkadag şäheriniň iňlis diline ýöriteleşdirilen 4-nji orta mekdebiniň 11-nji synp okuwçysy Jemal Hallyýewa, Daşoguz welaýatynyň Daşoguz şäherindäki daşary ýurt dillerine ýöriteleşdirilen 24-nji orta mekdebiniň 12-nji synp okuwçysy Arzuw Şyhyýewa dagy ýeňiş gazanmagy başardylar.
Akyl-paýhas bäsleşiginiň IV möwsüminiň II ýarym final oýnuna Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Milli ýaý atyjylyk federasiýasy, «Abadan haly» açyk görnüşli paýdarlar jemgyýeti hemaýatkärlik etdiler. Ýeňijiler we bäsleşige gatnaşyjylar ýadygärlik sowgatlar bilen sylaglandylar. Şeýle-de olara institutymyzyň Hormat hatlary gowşuryldy.
«Parahatçylygyň ýaş çaparlary» atly akyl-paýhas bäsleşiginiň IV möwsüminiň II ýarym final oýny Türkmenistanyň Telewideniýe, radiogepleşikler we kinematografiýa baradaky döwlet komitetiniň «Miras» teleradioýaýlymy hem-de Türkmenistanyň Daşary işler ministrliginiň Halkara gatnaşyklary institutynyň okuw studiýasy bilen bilelikde ýazgy edildi. Bäsleşik ýakyn günlerde «Miras» teleýaýlymynda tomaşaçylara ýetiriler.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby, «Parahatçylygyň ýaş çaparlary» atly
akyl-paýhas bäsleşiginiň I we II möwsümleriniň ýeňijisi.