«Filosofiýa — ähli ylymlaryň gözbaşy» atly ylmy seminar geçirildi
2025-nji ýylyň 19-njy noýabrynda Türkmenistanyň Daşary işler ministrliginiň Halkara gatnaşyklary institutynda Bütindünýä filosofiýa gününe bagyşlanan «Filosofiýa — ähli ylymlaryň gözbaşy» atly ylmy seminar geçirildi. Oňa institutymyzyň professor-mugallymlary we talyp ýaşlary gatnaşdylar. Ylmy seminarda Jemgyýeti öwreniş ylymlary kafedrasynyň uly mugallymy, filosofiýa ylymlarynyň kandidaty Ogulgurban Ezimowa çykyş etdi.
Bu seminaryň dowamynda halypa mugallym filosofiýa ylmynyň jemgyýetiň ösüşi üçin uly orna eýedigi, ýaşlaryň aňynda watançylyk duýgularyny oýarmakda onuň ähmiýeti hem-de häzirki döwürde ösüp barýan ýaş nesilde filosofiýa ylmyna bolan gyzyklanmanyň has-da artýandygy dogrusynda belläp geçdi. Hakykatdan-da, institutymyzyň talyp ýaşlary ýaňy ýakynda Halkara ynsanperwer we ösüş uniwersitetinde geçirilen II Halkara “Filosofiýa” internet olimpiadasyna gatnaşyp, birnäçe baýrakly orunlara mynasyp bolandyklary hem aýratyn nygtalmaga mynasypdyr.
Seminaryň dowamynda talyp ýaşlar hem çykyş edip, häzirki döwürde ýurdumyzda ýaşlara okamak we döredijilik bilen meşgullanmaga döredilýän mümkinçilikler we ylym-bilim ulgamynda alnyp barylýan özgertmeler dogrusynda belläp geçdiler.
Seminara gatnaşyjylar okamaga, döredijilikli zähmet çekmäge, ylym bilen meşgullanmaga döredip berýän mümkinçilikleri üçin Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Bakyguly ORAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.