Energetika diplomatiýasynyň möwsümleýin okuw sapaklary tamamlandy
2023-nji ýylyň 7-nji iýulynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň “Energetika diplomatiýasy” ugry boýunça 2022-2023-nji okuw ýylynyň II ýarymyndaky fakultatiw okuw sapaklary tamamlandy.
Geçirilen bu fakultatiw okuw sapaklarynda talyp ýaşlara Garaşsyz we baky Bitarap Türkmenistan döwletimiziň halkara gatnaşyklarynda alyp barýan energetika diplomatiýasy we onuň döwletleriň arasynda ýangyç-energetika, söwda-ykdysady gatnaşyklary ösdürmekdäki ähmiýeti, ýurdumyzyň halkara derejesinde howpsuz energiýa ulag-üstaşyr geçelgelerini gurmakda öňe sürýän başlangyçlary barada giňişleýin gürrüň berildi.
Okuw sapaklaryny üstünlikli tamamlan talyp ýaşlara ýörite Şahadatnamalar gowşuryldy. Bu okuw sapaklary ýaş nesillere diplomatiýanyň täze ugurlaryny we onuň halkara gatnaşyklarynda ulanylýan usullaryny düýpli öwretmekde uly ähmiýete eýe boldy.
Hojamyrat BAÝLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
I ýyl talyby.