ENE SÜÝDI BILEN IÝMITLENDIRMEGIŇ BÜTINDÜNÝÄ HEPDELIGI
Her ýylyň 1-nji awgustyndan 7-nji awgusty aralygynda dünýäde “Ene Süýdi Bilen Iýmitlendirmegiň Bütindünýä Hepdeligi” geçirilýär. Bu çäräniň geçirilmeginiň esasy maksady köpçülige ene süýdüniň ähmiýetini düşündirmekden we onuň çagany köp kesellerden gorap biljekdigini wagyz etmekden ybarat bolup durýar.
Bu hepdelik, 1990-njy ýylyň awgust aýynda ýokary derejeli hökümet işgärleri, Bütindünýä saglygy goraýyş guramasy, UNICEF we beýleki guramalar tarapyndan gol çekilip, ene süýdi bilen iýmitlendirmegi höweslendirmek we goldamak baradaky Innosenta Jarnamasynyň hormatyna döredilýär. Ene süýdi bilen iýmitlendirmek enäniň saglygyna peýdaly bolşy ýaly, çaganyň saglygyna hem gaty peýdalydyr. Ene süýdi diňe bir iýmit bolup hyzmat etmän, eýsem keseliň öňüni alyş, bejergi hökmünde hyzmat edýändir. “Ilkinji ene süýdi” çagany keselden goraýan antikorlara gaty baýdyr. Ene süýdi bilen iýmitlendirmek ýaş çagalarda beýniniň ösmegine kömek edýär, hem-de çagalary ýokanç kesellerden goraýar we semizlik howpuny peseldýär.
“Ene Süýdi Bilen Iýmitlendirmegiň Bütindünýä Hepdeligi” aýallaryň arasynda ene süýdi bilen iýmitlendirmegiň çaganyň saglygyna peýdalylygy baradaky maglumatlylygy has hem ýokarlandyrmak maksady bilen geçirilýär. Bu hepdeligiň geçirilmegi çaganyň ene süýdi bilen iýmitlenmek hukugyny we enäniň çagany ene süýdi bilen iýmitlendirmek hukugyny goramagy maksat edinýär.
Biziň ýurdumyzda hem ene süýdi bilen iýmitlendirmek meselelerine aýratyn üns berilýär. Muňa subutnama hökmünde, 2016-njy ýylda kabul edilen “Ene süýdi bilen iýmitlendirmegi wagyz etmek we goldamak hakynda” Türkmenistanyň kanuny hereket edýär. Kabul edilen kanun esasynda ene süýdi bilen iýmitlendirmegi goramak we goldamak maksady bilen “Enäniň we çaganyň saglygyny goraýyş ylmy-kliniki” merkeziniň açylmagy, çagalaryň sagdyn geljegine gönükdirilendir.
Amanbagt USSAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň talyby.