Ene diliniň Bütindünýä güni we türkmen dilimiz
Her ýylyň 21-nji fewralynda “Ene diliniň Bütindünýä güni” dünýäde giňden bellenilýär. Bu sene öz gözbaşyny 1999-njy ýylyň 17-nji noýabrynda geçirilen ÝUNESKO-nyň Baş konferensiýasynda “Ene diliniň Bütindünýä gününi” (International Mother Language Day) bellemek baradaky karardan alyp gaýdýar. Şondan soňra 2000-nji ýyldan bäri bu baýram Ýer ýüzünde her ýyl bellenilip geçilýär.
Biz hem şu halkara güni mynasybetli öz ykbalyny ene dili bilen ýakyndan baglanyşdyran Türkmenistanyň DIM-niň Halkara gatnaşyklary institutynyň Halkara žurnalistikasy fakultetiniň 3-nji ýyl talyby Sona Halykowa bilen söhbetdeş bolduk.
-Sona, sizi ene diliniň Bütündünýä güni bilen gutlaýaryn.
-Sag boluň! Men hem öz gezegimde ähli halkymyzy bu baýram bilen tüýs ýürekden gutlaýaryn. Bu belli sene-de ozaly bilen ene dilimiz bolan türkmen diline döwlet derejesiniň berilmegi hakydaňa gelýär. 1990-njy 24-nji maýynda “Döwlet dili hakyndaky” Kanunyň, 1993-nji ýylyň 12-nji aprelinde täze türkmen elipbiýiniň kabul edilmegi bizi diýseň buýsandyrýar. Hormatly Prezidentimiziň dil taglymaty esasynda ýurdumyzda türkmen dilini içgin öwrenmek ugrunda uly işler alnyp barylýar. Institutymyzda türkmen dilini höwes bilen özleşdirýäris. Arkadagymyzyň bize sowgat beren “Türkmen diliniň düşündirişli sözlügi” atly 2 jiltli kitabynyň neşir edilmegi, biz, talyp ýaşlara gadymy türkmen dilini öwrenmäge diýseň uly goldaw berýär. Sözümiň şu ýerinde şahyr Berdinazar Hudaýnazarowyň bu ugurdaky goşgy setirlerini ýatlasym gelýär.
Sen meniň gazabym, sen meniň näzim,
Ýüregimde gaýnap çykýan owazym.
Babalardan miras galan ýalňyzym-
Eziz ene dilim, mähriban dilim.
Men hem ene dilimizde goşgy, makalalar ýazyp instututymyzda hereker edýän “Ýaş diplomatyň sesi” atly gazetimizde, şeýle hem döwürleýin metbugatda yzygiderli çykyş edýärin.
-Siz institutymyzda ene dilimiz bilen birlikde öwrenilýän dünýä dilleri barada hem gürrüň beräýseňiz?
-Elbetde, biz türkmen dili bilen bir hatarda dünýä dillerini hem öwrenýäris. Olaryň hatarynda rus, iňlis, hytaý, pars, arap, ýapon, fransuz, nemes we türk dillerini öwrenmäge uly mümkinçilikler döredilendir. Talyplaryň okamaklary, bilim derejelerini artdyrmaklary üçin institutymyzda nemes we türk dilleri kitaphanalary hem hereket edýär.
Pursatdan peýdalanyp, hormatly Prezidentimize ene dilimizi we esasy dünýä dillerini içgin öwrenmäge döredip berýän mümkinçilikleri üçin alkyş aýdýarys.
-Beren gürrüňleriňiz üçin köp sag boluň!
Gunça HAMEDOWA,
Türkmenistanyň Daşary işler ministrliginiň
Halkara gatnaşyklary institutynyň Halkara žurnalistikasy fakultetiniň I ýyl talyby.