Amerikanyň Birleşen Ştatlarynyň diplomatlary bilen jemgyýetçilik diplomatiýasy boýunça okuw sapagy geçirildi
2026-njy ýylyň 13-nji fewralynda Türkmenistanyň Daşary işler ministrliginiň Halkara gatnaşyklary institutynda Amerikanyň Birleşen Ştatlarynyň Türkmenistandaky Ilçihanasynyň diplomatlarynyň gatnaşmagynda jemgyýetçilik diplomatiýasy babatda okuw sapagy geçirildi. Onda Türkmenistanyň Daşary işler ministrliginiň Halkara gatnaşyklary institutynyň Iňlis dili mugallymy Joşua Tilton, Halkara gatnaşyklary we diplomatiýasy kafedrasynyň mugallymy Akmuradow Rahym, şeýle hem ABŞ-nyň Türkmenistandaky Ilçihanasynyň diplomatlary Mark Gul we Daniel Riffle çykyş etdiler.
Çykyşlarda jemgyýetçilik diplomatiýasynyň döwletleriň arasynda ynanyşmagy berkitmekde, medeni-ynsanperwer hyzmatdaşlygy ösdürmekde, şeýle hem halkara jemgyýetçiliginde ýurduň oňyn keşbini döretmekde tutýan möhüm orny aýratyn bellenildi. Diplomatlar öz iş tejribelerine esaslanyp, dürli ýurtlarda alnyp barylýan jemgyýetçilik diplomatiýasynyň üstünlikli nusgalary, häzirki zaman kommunikasiýa serişdeleriniň mümkinçilikleri hem-de ýaşlaryň halkara gatnaşyklaryndaky orny barada gyzykly maglumatlary paýlaşdylar.
Duşuşygyň dowamynda talyplar daşary ýurt diplomatyýasynyň gündelik işi, diplomatik gatnaşyklary alyp barmagyň aýratynlyklary, halkara çäreleriniň guralyş tertibi ýaly meseleler boýunça sorag-jogap alyşdylar.Okuw sapagynyň sorag-jogap görnüşinde geçirilen interaktiw bölümi çärä gatnaşyjylaryň işjeňligini artdyrdy we olaryň hünär ugurlaryna bolan gyzyklanmasyny güýçlendirdi.
Bu çäre talyplaryň nazary bilimlerini amaly tejribe bilen utgaşdyrmakda, halkara hyzmatdaşlygyň häzirki ugurlaryny çuňňur öwrenmekde hem-de geljekki diplomatlaryň taýýarlyk derejesini ýokarlandyrmakda möhüm ähmiýete eýe boldy. Şeýle duşuşyklar Türkmenistanyň halkara gatnaşyklary ulgamyndaky açyklygyny we bilim hyzmatdaşlygyny ösdürmäge gönükdirilen syýasatynyň aýdyň mysalydyr.
Arslan SYÝAHATOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 5-nji ýyl talyby.