02/04/2024
1090
«Emeli aňy ulanmak we maglumat ygtybarlylygy» atly ussatlyk okuw sapagy geçirildi
2024-nji ýylyň 2-nji aprelinde Türkmenistanyň Daşary işler ministrliginiň Halkara gatnaşyklary institutynda Amerikanyň Birleşen Ştatlarynyň Türkmenistandaky Ilçihanasynyň gurnamagynda «Emeli aňy ulanmak we maglumat ygtybarlylygy» atly ussatlyk okuwy geçirildi. Oňa Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň hem-de Halkara ynsanperwer ylymlary we ösüş uniwersitetiniň žurnalistika fakultetinde okaýan talyplary gatnaşdylar.
Ussatlyk okuwynyň dowamynda oňa gatnaşyjylar emeli aňy ulanmak, habarlaryň ygtybarlylygy, olary seljermegiň meseleleri boýunça öňdebaryjy tejribeler bilen tanyşdyryldy. Halkara bilermenler media-sowatlylygyň bu günki ýeten derejesi we mümkinçilikleri barada giňişleýin düşünje berdiler.
Okuw sapagy täsirliligi bilen tapawutlanyp, onda sanly ulgamyň mümkinçiliklerini dogry peýdalanmagyň ýollary barada giňişleýin maglumatlar berildi. Çäräniň ahyrynda talyplar özlerini gyzyklandyrýan soraglara hünärmenler tarapyndan ýerlikli jogaplary aldylar.
Zibagözel HALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
II ýyl talyby.