“Medeni mirasy gorap saklamak baradaky ABŞ-nyň Ilçileriniň gaznasy” atly maksatnamanyň çäklerinde geçirilen duşuşyk
2024-nji ýylyň 6-njy noýabrynda Türkmenistanyň Daşary işler ministrliginiň Halkara gatnaşyklary institutynda “Medeni mirasy gorap saklamak baradaky ABŞ-nyň Ilçileriniň gaznasy” atly maksatnamanyň çäklerinde ABŞ-nyň «Merrion & Smith» kompaniýasynyň, Kongresiniň kitaphanasynyň we Aýowa uniwersitetiniň wekilleriniň we institutyň talyplarynyň gatnaşmagynda duşuşyk geçirildi.
Duşuşygyň dowamynda ABŞ-dan gelen wekilleri edebi eserleriň terjimesinde hakykylygynyň saklanyp galmagynyň möhümdigini we möhüm eserleri terjime etmekde dürli kynçylyklaryň ýüze çykýandygy barada belläp geçdiler. Şeýle-de, amerikan hünärmenleri Magtymguly Pyragy we Möwlana Jelaleddin Rumy ýaly görnükli şahyrlaryň arabaglanyşygyny beýan edýän edebi eserleriň many-mazmunynyň goralyp saklanylmagyna hem uly üns berilýändigini nygtap geçdiler.
Şeýle duşuşyklaryň yzygiderli geçirilmegi talyplaryň terjimäniň inçe syrlaryna, medeniýetleriň özara baglanyşygyna, medeni mirasyň goralyp saklanylmagyna we geljekki nesillere ýetirmeklige has hem jogapkärli çemeleşmekleri üçin giň şertleri döredýär.
Mährijemal ABDULLAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.