Durnukly ösüş maksatlary boýunça okuw sapaklarynyň nobatdaky tapgyry
Türkmenistanyň Sport we ýaşlar syýasaty ministrliginiň garamagyndaky sport mekdeplerinde Türkmenistanyň Daşary işler ministrliginiň Halkara gatnaşyklary institutynda hereket edýän Durnukly ösüş maksatlary boýunça ylmy-usulyýet merkezi tarapyndan 2020-2021-nji okuw ýyly üçin ylalaşylan okuw maksatnamasyna laýyklykda gurnalýan okuw sapaklarynyň nobatdaky tapgyry dowam edýär. Tapgyryň dowamynda Türkmenistanyň Saglygy goraýyş we derman senagaty ministrliginiň, Türkmenistanyň Bilim ministrliginiň, Türkmenistanyň Hazar deňzi institutynyň, Türkmenistanyň Oba hojalyk we daşky gurşawy goramak ministrliginiň wekilleriniň degişlilikde Durnukly ösüş maksatlarynyň 3-nji, 4-nji, 6-njy we 13-nji maksatlary boýunça çykyşlary meýilleşdirildi.
2021-nji ýylyň 16-njy martynda Sport we ýaşlar syýasaty ministrliginiň garamagyndaky Ýaş olimpiýaçylary taýýarlaýyş mekdebinde Durnukly ösüş maksatlary boýunça ylmy-usulyýet merkeziniň hem-de Türkmenistanyň Bilim ministrliginiň wekilleriniň we şol mekdebiň mugallymlarynyň, okuwçylarynyň gatnaşmagynda Durnukly ösüş maksatlarynyň 4-nji maksady bolan Ýokary hilli bilim boýunça okuw sapagy geçirildi. Onuň dowamynda häzirki döwürde hormatly Prezidentimiziň parasatly ýolbaşçylygynda ýurdumyzyň dünýäniň iri ylym-bilim merkezleri, halkara guramalary hem-de gaznalary bilen hyzmatdaşlygynyň has-da giňeldilýändigi, bilim ulgamyna dünýä ülňüleriniň ornaşdyrylýandygy, ynsanperwer ulgamda Birleşen Milletler Guramasy, Ýewropa Bileleşigi bilen özara gatnaşyklarynyň ösdürilýändigi aýratyn bellenildi. Okuw sapagynyň ahyrynda oňa gatnaşanlar Gahryman Arkadagymyza döredip berýän ajaýyp mümkinçilikleri üçin alkyş sözlerini aýtdylar.
Aýgül MÄTIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby