Durnukly ösüş maksatlary boýunça okuw sapaklarynyň nobatdaky tapgyry ýokary guramaçylyk derejesinde geçirildi
2024-nji ýylyň 5-nji fewralynda Türkmenistanyň Daşary işler ministrliginiň Halkara gatnaşyklary institutynyň Durnukly ösüş maksatlary boýunça ylmy-usulyýet merkezinde 2023-2024-nji okuw ýyly üçin ylalaşylan okuw maksatnamasyna laýyklykda, Birleşen Milletler Guramasynyň Aşgabatdaky wekilhanasy bilen hyzmatdaşlykda Durnukly ösüş maksatlary boýunça okuw sapaklarynyň nobatdaky tapgyry geçirildi. Okuw sapagyna BMG-niň Türkmenistandaky Hemişelik utgaşdyryjysy Dmitriý Şlapaçenko gatnaşyp, Türkmenistan bilen BMG-niň arasynda hyzmatdaşlygyň barha ilerleýändigini belläp, Durnukly ösüş maksatlaryna ýetmekde ýurdumyzyň alyp barýan işleriniň ýokary ähmiýetini nygtady. Okuw sapaklaryň dowamynda Birleşen Milletler Guramasynyň Aşgabatdaky wekilhanasynyň wekilleri Durnukly ösüş maksatlarynyň ähli 17-si boýunça çykyş etdiler.
Okuw sapaklaryna Aşgabat we Arkadag şäherleriniň çäklerinde ýerleşýän Türkmenistanyň ýokary okuw mekdepleriniň wekilleri gatnaşdy. Onuň dowamynda häzirki döwürde hormatly Prezidentimiziň parasatly ýolbaşçylygynda ýurdumyzda howanyň global üýtgemeginiň zyýanly täsirlerini azaltmak boýunça alnyp barylýan işler, BMG-niň maksatlary we wezipeleri, şäherleri we ilatly ýerleri durnukly ösdürmek, adamlar üçin mynasyp ýaşaýyş şertlerini üpjün etmek wezipeleri dogrusynda gürrüň edildi. Şeýle hem dünýä nusgalyk “akylly” we “ýaşyl” tehnologiýalar şäheri bolan Arkadag şäheri, durnukly ösüşi üpjün etmekde ygtybarly we durnukly energiýa ulgamynyň orny, Durnukly ösüş maksatlaryna ýetmek üçin ulagyň ähli görnüşleriniň arabaglanyşygyny berkitmek dogrusynda we bu ugurda Türkmenistan döwletimiziň halkara başlangyçlarynyň we tagallalarynyň ähmiýeti barada bellenildi.
Gapbar Hallyýew,
Türkmenistanyň Daşary işler ministrliginiň
Halkara gatnaşyklary institutynyň mugallymy.
Şeýle hem bu barada şu ýerden
okap bilersiňiz: