Diplomatiýa we bilim: talyplaryň Maşatdaky tejribeliginden
Meşhur pars alymy we akyldary Awisenna: «Amalsyz bilim miwesiz agaç ýalydyr» diýip belleýär. Bu sözler biziň – Türkmenistanyň Daşary işler ministrliginiň Halkara gatnaşyklary institutynyň talyplarynyň daşary ýurtlardaky diplomatik wekilhanalarymyzda geçýän önümçilik tejribeliginiň manysyny dolulygyna açyp görkezýär.
Güýz möwsüminiň ilkinji günlerinden başlap, bize Türkmenistanyň Eýran Yslam Respublikasynyň Maşat şäherinde ýerleşýän Baş konsullygynda önümçilik tejribeligini geçmek miýesser etdi. Tejribelik noýabr aýynyň ahyryna çenli dowam eder. Şu wagtdan bir hakyky ynam bilen aýdyp bileris: bu ýerde geçirilen her gün nazary bilimlerimizi hakyky diplomatik iş bilen baglanyşdyrmaga mümkinçilik berýän gymmatly sapakdyr.
Baş konsullyk Eýranda ýaşaýan we bolýan watandaşlarymyzyň durmuşynda möhüm orun eýeleýär. Tejribeligiň ilkinji günlerinden başlap, biz konsullyk işiniň diňe resminamalar we düzgünler bilen çäklenmän, ilkinji nobatda, adamlara üns bermekden, olaryň wajyp meselelerini çözmekden, kyn ýagdaýlarda goldaw bermekden ybaratdygyna düşündik.
Konsullygyň işgärler toparyny aýratyn bellemek gerek. Bu ýerde her bir işgär talyplar bilen tejribesini paýlaşmaga we goldaw bermäge hemişe taýýar. Hoşniýetlilik we halypalyk ruhy talyplara aýratyn ynam we rahatlyk duýgusyny döredýär.
Maşat şäheri Eýranyň demirgazyk-gündogarynyň ýüregi we Horasan-Rezawi welaýatynyň ruhy paýtagty hasaplanýar. Ol Türkmenistanyň serhedinden bary-ýogy 75 kilometr uzaklykda ýerleşýär. Maşat 3,5 milliondan gowrak ilaty bilen Eýranyň ikinji uly şäheridir.
Şäher Eýranyň ruhy we medeni merkezi hökmünde giňden tanalýar. Bu ýerde dünýäniň dürli künjeklerinden zyýaratçylar gelýän Ymam Reza mazary ýerleşýär. Biz muzeýlere, seýilgählerdir bazarlara-da baryp gördük, bu ýerlerde şäheriň hakyky durmuşyny synlap bolýar. Bu gezelençler bize myhman ýurdumyzyň adamlaryny, däplerini we medeniýetini has çuň düşünmäge mümkinçilik berýär.
Ýerli medeniýet aýratyn täsir galdyrýar. Eýranlylar myhmansöýerligi, açyk ýürekli bolmagy bilen aýratyn tapawutlanýarlar. Ýerli halkyň myhmansöýerligi öýde hödürlenýän çaý-çörekde hem, köçelerde bir-birege aýdylýan mylaýym sözlerde-de duýulýar.
Tejribeligimiz heniz dowam edýär, ýöne bu başdan geçirmäniň biziň hünär we şahsy ösüşimizde möhüm menzil boljakdygyny eýýäm duýýarys. Her bir günümiz oňyn täsirli wakalara baý bolup geçýär. Şol täsirler hem biziň ýüreklerimizde ömürlik möhürlener.
Türkmen ýaşlaryna dünýä ýurtlarynda tejribe geçmek üçin giň mümkinçilikleri döredýän Gahryman Arkadagymyzyň, Arkadagly Gahryman Serdarymyzyň janlary sag, belent başlary aman bolsun, tutýan tutumly işlerine hemişe rowaçlyklar ýar bolsun!
Bereket Öwezgeldiýew,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň V ýyl talyby.