DERS OLIMPIADANYŇ II TAPGYRY GEÇIRILDI
2025-nji ýylyň 14-nji aprelinde Türkmenistanyň Daşary işler ministrliginiň Halkara gatnaşyklary institutynda Türkmenistanyň Magtymguly adyndaky Ýaşlar guramasynyň Merkezi geňeşi bilen bilelikde guramagynda “Watanyň daýanjy – bilimli ýaşlar, Arkadagly Gahryman Serdaryň guwanjy ýaşlar!” atly olimpiadanyň II tapgyry geçirildi.
Olimpiada Birleşen Milletler Guramasynyň Baş Assambleýasynyň bilimiň ählumumy parahatçylygy we ählumumy durnukly ösüşi gazanmakdaky möhüm ornuny dabarlandyrmak üçin 2018-nji ýylyň 3-nji dekabryndaky Kararnamasy bilen yglan edilen Halkara bilim gününe bagyşlanyldy.
Ders olimpiadanyň II tapgyrynda gatnaşmaga hukuk gazanan ýurdumyzyň ähli welaýatlaryndan we Aşgabat, Arkadag şäherlerinden jemi 178 okuwçy gatnaşdy. Olimpiadanyň I we II tapgyrlarynyň jemleri boýunça I orna Ak bugdaý etrabynyň tebigy we takyk ugurly okuw derslerini çuňlaşdyryp öwredýän ýöriteleşdirilen 46-njy orta mekdebiniň 12-nji synp okuwçysy Mähri Durdynazarowa, Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 12-nji synp okuwçylary Annajemal Arslanowa, Merjen Öwezberdiýewa, II orna Mary welaýatynyň Mary şäheriniň 19-nji orta mekdebiniň 12-nji synp okuwçysy Näzik Amanowa, Mary welaýatynyň Sakarçäge etrabynyň 1-nji orta mekdebiniň 12-nji synp okuwçysy Bibiaýşa Mekanowa, Mary welaýat Sakarçäge etrap Şatlyk şäher takyk we tebigy ugurlardan ýöriteleşdirilen 43- nji orta mekdebiniň 12-nji synp okuwçysy Ata Toýlyýew, III orna bolsa Mary welaýatynyň Murgap etrabynyň 36-njy orta mekdebiniň 12-nji synp okuwçylary Maýa Akmyradowa, Güljennet Alyýewa, Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 12-nji synp okuwçysy Muhammetnur Maksatmyradow dagylar mynasyp boldular.
Maksat ALYMBAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.