Çagalary goramagyň halkara gününe bagyşlanan maslahat we sergi geçirildi
2024-nji ýylyň 1-nji iýunynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Daşary işler ministrligi tarapyndan Çagalary goramagyň halkara güni mynasybetli maslahat we sergi geçirildi.
Maslahat başlamazdan ozal, TDIM-iň Halkara gatnaşyklary institutynyň baş binasynyň giň eýwanynda Medeniýet ministrliginiň, Birleşen Milletler Guramasynyň, Ýewropa Bileleşiginiň, Ýewropada Howpsuzlyk we Hyzmatdaşlyk Guramasynyň, Amerikanyň Birleşen Ştatlarynyň Halkara ösüş gullugynyň (USAID) Aşgabatdaky wekilhanalarynyň, Türkmenistanyň Gyzyl Ýarymaý Milli jemgyýetiniň, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, D.Azady adyndaky Türkmen milli dünýä dilleri institutynyň hem-de Halkara gatnaşyklary institutynyň gatnaşmagynda sergi guraldy. Serginiň çäklerinde çagalaryň ýerine ýetirmeginde parahatçylygy, dost-doganlygy, bagtyýar çagalygy wasp edýän aýdym-sazlar ýaňlandy. Şeýle hem daşary ýurtlaryň we halkara guramalaryň Türkmenistandaky diplomatik wekilhanalarynyň işgärleriniň çagalarynyň dürli dillerde aýdan goşgulary baýramçylyk ruhuny has hem belende göterdi.
Soňra mejlisler zalynda maslahat öz işine başlady. Maslahatyň dowamynda Türkmenistanyň Daşary işler ministriniň orunbasary Mähri Bäşimowa, Ýewropa Bileleşiginiň Türkmenistandaky Adatdan daşary we Doly ygtyýarly Ilçisi Beata Peksan, Birleşen Milletler Guramasynyň Türkmenistandaky Hemişelik utgaşdyryjysy Dmitriý Şlapaçenko, BMG-niň Çagalar gaznasynyň Türkmenistandaky wekiliniň wezipesini wagtlaýyn ýerine ýetirijisi Aleksandru Nartea, Ýewropada Howpsuzlyk we Hyzmatdaşlyk Guramasynyň Türkmenistandaky Merkeziniň ýolbaşçysy Jon MakGregor, Türkmenistanyň Adam hukuklary boýunça ygtyýarly wekili – Adalatçysy Ýazdursun Gurbannazarowa hem-de Enäniň we çaganyň saglygyny goraýyş ylmy-kliniki merkeziniň hirurgiýa bölüminiň lukmany Allanur Saryýew dagylar çykyş etdiler.
Çykyşlarda Türkmenistanda milli kanunçylyga laýyklykda, çagalary durmuş taýdan goldamak babatda uly tagallalaryň edilýändigi aýratyn bellenildi. Türkmenistanyň bütin dünýäde bagtly çagalygyň, çagalaryň iň arzyly islegleriniň hasyl bolýan ýurdy hökmünde tanalýandygy, ýurdumyzyň halkara derejedäki şeýle abraý-mertebesiniň sakasynda adam hakynda edilýän aladalaryň, çagalary goramak babatda alnyp barylýan oňyn döwlet syýasatynyň durandygy, döwletimiziň howandarlyga mätäç çagalara berýän hemmetaraplaýyn kömek-goldawynyň çagalaryň bähbitlerine gönükdirilýändigi nygtaldy. Hususan-da, daşary ýurtly wekiller Gahryman Arkadagymyzyň başlangyjy bilen döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan işine ýokary baha berdiler.
Mälim bolşy ýaly, 2021-nji ýylda Gahryman Arkadagymyzyň başlangyjy esasynda döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan mätäç çagalara 140-dan gowrak operasiýa geçirildi we ýatymlaýyn şertlerde bejergi işleri amala aşyryldy. Ýurdumyzyň welaýatlaryndaky hassahanalaryň çagalar bölümlerine «Tiz kömek» awtoulaglarynyň berilmegi, haýyr-sahawat gaznasynyň serişdeleriniň hasabyna zerur bolan saglygy goraýyş maksatly serişdeleriň yzygider gönükdirilmegi bu ugurda alnyp barylýan işleriň netijeli häsiýete eýedigine şaýatlyk edýär. Şunuň bilen baglylykda, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan ynsanperwer işleriniň Birleşen Milletler Guramasynyň Türkmenistanda hereket edýän dürli agentlikleriniň wekilleriniň arasynda giňden ykrar edilýändigi aýdyldy.
Maslahatyň ahyrynda oňa gatnaşyjylaryň adyndan Türkmenistanyň hormatly Prezidenti Serdar Berdimuhamedowa Ýüzlenme kabul edildi.
Ajaýyp NOBATOWA,
TDIM-iň Halkara gatnaşyklary institutynyň
Halkara žurnalistikasy fakultetiniň III ýyl talyby.