BÜTINDÜNÝÄ RADIO GÜNI
Habar beriş serişdeleriniň giňden ýaýran görnüşleriniň biri-de radiodyr. Radio uzak ýerlere habar bermek üçin iň ygtybarly serişde bolup durýar. 2012-nji ýylda BMG-niň Baş Assambleýasynyň tassyklamagy esasynda “Bütindünýä radio gününiň” halkara senesini her ýylyň 13-nji fewraly diýlip yglan edildi. Radio global derejede-de has köp ulanylýan köpçülikleýin habar beriş serişdeleriniň biri bolmagyny bu günki günde hem dowam etdirýär. Bütindünýä radio gününden başga-da, aragatnaşyk muşdaklary “Bütindünýä radio höwesjeňler gününi” hem giňden belleýärler. 1950-nji ýylyň 12-nji fewralynda Ýewropada radiogepleşikler birleşmesi döredilýär. Onuň baş edarasy Ženewada ýerleşip, diňe Ýewropada däl-de, eýsem Aziýada, Afrikada, Latyn Amerikasynda hem agzalary bolupdyr.
Radionyň esasy aýratynlygynyň biri-de, auditoriýasynyň giňişliginde eşidiş arkaly kabul edilýändigidir. Radioýaýlymlarda şekil bolmandygy üçin diňleýji gepleşigi alypbaryjynyň aýdýan her bir sözüni üns bilen diňläp, göz öňünde janlandyrýar. Radio jemgyýetiň köpdürlilik tejribesini emele getirýän meýdançadyr.
Radio hakynda söhbet açylanda türkmen radiosy we onuň ösüş ýoly barada hem gysgaça durup geçeliň! Türkmen radiosy öz gözbaşyny esasan 1926-njy ýylda döredilen “Radiosöýüjileriň” jemgyýetinden alyp gaýdýar. Ilatly ýerleri radio enjamlary bilen üpjün etmek-de, jemgyýetiň esasy wezipeleriniň biri bolup durýar. 1927-njy ýylyň 7-nji noýabrynda “Türkmenradio” jemgyýeti döredilip, ilkinji radiogepleşikler ýaýlyma berlip başlanýar. Arhiw resminamalaryndaky maglumatlaryň şaýatlyk etmegine görä, “Gepleýär Aşgabat!” – bu sözler ilkinji gezek paýtagtymyzda işe girizilen radiostansiýadan, 80 ýyl mundan ozal ýaňlanypdyr.
Şeýlelik bilen güýçli depginde ösüp başlan türkmen radiosy halk hojalygynda gazanylýan üstünliklerini, jemgyýetçilik durmuşyndaky möhüm wakalaryny, 1941-1945-nji ýyllaryň Beýik Watançylyk urşy ýyllarynda uruş döwrüniň habarlaryny ýetirmekde uly işleri bitirýär. Uruşda gazanylan Beýik Ýeňiş baradaky şatlykly habary radioda diktor Arap Gurbanowyň okamagynda türkmen halkyna ýetirilipdir.
Garaşsyzlyk döwrümizde türkmen radiosy täze hil derejesine ýetdi. Häzirki wagtda “Watan”, “Çar tarapdan”, “Miras”, “Owaz” radioýaýlymlary bar. Her bir radioýaýlymyň öz ugry boýunça ýörite bölümleri bolup, her bölümiň öz ugry boýunça-da birnäçe gepleşikleri meýilnama esasynda taýýarlanylýar. Ýurdumyzda yzygiderli eşitdirilýän radiogepleşikler öz diňleýjilerini diňe bir habarlar bilen üpjün etmek bilen çäklenmän, eýsem, birnäçe gyzykly, terbiýeçilik ähmiýetine eýe bolan medeni-dynç alyş sahypalary bilen hem ruhy lezzet berýär.
Meýlis SADYKOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň talyby.