BÜTINDÜNÝÄ POÇTA GÜNI
Her ýylyň 9-njy oktýabrynda «Bütindünýä poçta güni» dünýäde giňden bellenilýär. Bu sene öz gözbaşyny 1874-nji ýylyň 9-njy oktýabrynda «Ählumumy poçta bileleşiginiň» döredilmeginden alyp gaýdýar. 1969-njy ýylda Ýaponiýanyň Tokio şäherinde geçirilen Ählumumy poçta bileleşiginiň 16-njy gurultaýynda her ýyl «Bütindünýä poçta gününi» bellemek ýörite kararnama esasynda kabul edildi. Şoňdan soňra 1970-nji ýyldan bäri dünýäniň birnäçe ýurtlarynda poçta güni bellenilip geçilýär.
1984-nji ýylda Gamburgda geçirilen 19-njy poçta kongresinde «Bütindünýä poçta bileleşiginiň gününi» «Bütindünýä poçta gününe» öwürmek kararyna gelindi. Onuň esasy maksady poçta hyzmatlarynyň bütin dünýäde ýaýramagyny we ösmegini güýçlendirmekden ybarat bolup durýar.
Dünýäniň dürli ýurtlarynda Bütindünýä poçta güni bilen baglanyşykly birnäçe çäreler, ýaryşlar, sergiler, şeýle hem konsertler geçirilýär. Muňa mysal edip, 2005-nji ýylda Kamerunda poçta işgärleri bilen «CAMTEL» telekommunikasiýa kompaniýasynyň işgärleriniň arasynda futbol oýnunyň geçirilendigini bellemek bolar. 2006-njy ýylda bu günüň hormatyna Arhangelsk şäheriniň poçta bölüminde «Köýneklerden ýasalan hatlar» atly poçta gutularynyň sergisi geçirildi.
«Bütindünýä poçta güni» mynasybetli biziň institutymyzyň binalarynda hem hatlar üçin ýörite gutujyklar ýerleşdirilýär. Şol gutujyklaryň üsti bilen talyp ýaşlar öz deň-duşlaryna hem-de mugallymlaryna ýazan hatlaryny ýollaýarlar.
Gunça HAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.