BREÝN-RING BÄSLEŞIGI GEÇIRILDI
2026-njy ýylyň 30-njy oktýabrynda Türkmenistanyň Daşary işler ministrliginiň Halkara gatnaşyklary institutynda Halkara gatnaşyklary we diplomatiýa kafedrasynyň «Ýaş diplomatlar» ylmy gurnagynyň guramagynda talyp ýaşlaryň arasynda «Bitaraplyk — parahatçylyk we dostluk medeniýeti» atly breýn-ring bäsleşigi geçirildi. Bäsleşige Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Döwletmämmet Azady adyndaky Türkmen milli dünýä dilleri institutynyň talyplary gatnaşdylar. Breýn-ring bäsleşiginiň dowamynda toparlar ýurdumyzyň hemişelik Bitaraplygy, döwletimiziň umumadamzat bähbitlerini nazarlaýan daşary syýasaty, halkara gatnaşyklary we diplomatiýa barada sowallara jogap berdiler.
Gyzykly we çekeleşikli geçen bäsleşigiň netijelerine laýyklykda, Türkmenistanyň Daşary işler ministrliginiň Halkara gatnaşyklary instituty 1-nji orna, Magtymguly adyndaky Türkmen döwlet uniwersiteti 2-nji orna, Halkara ynsanperwer ylymlary we ösüş uniwersiteti 3-nji orna mynasyp boldy. Ýeňijilere degişli Diplomlar we ýadygärlik sowgatlar gowşuryldy.
Şeýle bäsleşikleriň yzygiderli geçirilmegi talyp ýaşlaryň ýurdumyzyň parahatçylyk söýüjilikli daşary syýasatyna we diplomatiýasyna bolan gyzyklanmalarynyň artmagyna, syýasy düşünjeleriniň kämilleşmegine, olarda goşmaça bilim endikleriniň kemala gelmegine uly goşant goşýar.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 4-nji ýyl talyby