23-nji aprel - Halkara kitap we awtorçylyk hukugy güni
Kitap, gündelik ýaşaýyş durmuşymyzyň hemme ýerinde hemişe iň ýakyn dostumyzdyr. Adamlaryň durmuşynda käbir döwürlerinde möhüm kararlar bermeli ýagdaýlary bolup bilýär. Bu döwürlerde köp kitap okaýan adamlar ýagdaýyň hem peýdaly hem zyýanly taraplaryny doly ölçerip dogry kararlary almagy başarýar.
Halkara kitap we awtorçylyk hukugy güni 1995-nji ýylyň 15-nji noýabrynda ÝUNESKO-nyň 28-nji mejlisinde yglan edildi. Şondan bäri bu halkara güni bellän ýurtlaryň we guramalaryň sany yzygiderli artýar. Bu halkara gün baradaky karar medeni däp-dessurlary öwretmek we ösdürmek maksady bilen, şeýle hem kitaplaryň bilimleri ýaýratmagyň iň möhüm serişdesi bolup hyzmat edýändigini we gymmatly maglumatlary gorap saklamagyň iň ygtybarly usulydygyny göz öňünde tutmak bilen kabul edildi.
ÝUNESKO her ýyl 1-23-nji apreli aralygynda Halkara kitap we awtorçylyk hukugy gününiň çäginde kitabyň ähmiýetini görkezmek üçin dürli çäreleri alyp barýar. Bu halkara gün mynasybetli ýurdumyzda kitap bäsleşikleri geçirilýär.
Güljan ORAZNEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň talyby.