"Bitaraplyk baýramy-türkmen halkynyň buýsanjy" atly çeper okaýyş bäsleşigi geçirildi
2024-nji ýylyň 2-nji dekabrynda Türkmenistanyň Daşary işler ministrliginiň Halkara gatnaşyklary institutynda Ýaş diplomatlaryň mekdebiniň guramagynda Aşgabat şäherindäki daşary ýurt dillerini çuňlaşdyryp öwredýän ýöriteleşdirilen 37-nji orta mekdebiniň, Annanyýaz Artyk adyndaky daşary ýurt dillerini çuňlaşdyryp öwredýän ýöriteleşdirilen 68-nji orta mekdebiniň, Türkmenistanyň Gahrymany Gurbansoltan eje adyndaky ýöriteleşdirilen 72-nji orta mekdebiniň, Ynsançylyk ugruny we daşary ýurt dili derslerini çuňlaşdyryp öwredýän ýöriteleşdirilen 76-njy orta mekdebiniň hem-de Aşgabat şäher häkimliginiň 21-nji ýöriteleşdirilen okuw-terbiýeçilik mekdebiniň ýokary synp okuwçylarynyň arasynda hemişelik Bitaraplygymyzyň şanly 29 ýyllygy mynasybetli "Bitaraplyk baýramy-türkmen halkynyň buýsanjy" atly çeper okaýyş bäsleşigi geçirildi. Bäsleşigiň birinji şertine görä, mekdep okuwçylary Gahryman Arkadagymyzyň kitaplaryndan, öz düzen goşgularyndan, şahyrlaryň şygyrlaryndan parçalary okap, Türkmenistan döwletimiziň Bitaraplygyny wasp etdiler. Bäsleşigiň ikinji şertinde hemişelik Bitaraplygymyz bilen bagly sowallara jogap berdiler.
Çekeleşikli geçen bäsleşigiň netijelerine görä, I orna Aşgabat şäher häkimliginiň 21-nji ýöriteleşdirilen okuw-terbiýeçilik mekdebiniň 12-nji synp okuwçysy Hydyr Seýranow, II orna Ynsançylyk ugruny we daşary ýurt dili derslerini çuňlaşdyryp öwredýän 76-njy orta mekdebiniň 10-njy synp okuwçysy Meňli Garajaýewa, III orna Ynsançylyk ugruny we daşary ýurt dili derslerini çuňlaşdyryp öwredýän 76-njy orta mekdebiniň 11-nji synp okuwçysy Merjen Orazmammedowa dagy mynasyp boldular.
Bike ANNAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.