Baş maksat — parahatçylyk dialogynyň medeniýetini ilerletmek
Bilşimiz ýaly, 2024-nji ýylyň 23-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Bilim ministrliginiň hem-de TDIM-iň Halkara gatnaşyklary institutynyň bilelikde guramagynda «Halkara gatnaşyklary: parahatçylyk dialogynyň medeniýeti» atly halkara bäsleşik öz işine başlady. Halkara bäsleşige Merkezi Aziýa we Hazarýaka döwletleriniň, Türkiýe Respublikasynyň, Hytaý Halk Respublikasynyň, şeýle hem Türkmenistanyň ýokary okuw mekdeplerinden jemi 250-den gowrak gatnaşyjy hasaba alyndy. Has takygy, bäsleşige daşary ýurtlaryň 9-ysyndan 11 sany abraýly ýokary okuw mekdebinden 40-a golaý magistrler we talyplar, şeýle hem Türkmenistanyň 22 sany ýokary okuw mekdebinden talyp ýaşlar gatnaşdylar.
Halkara bäsleşigiň açylyş dabarasy TDIM-iň Halkara gatnaşyklary institutynyň hem-de Maýa Kulyýewa adyndaky Türkmen milli konserwatoriýasynyň aýdym-saz we döredijilik toparlarynyň bilelikde taýýarlan baýramçylyk konserti bilen badalga aldy. Açylyş dabarasynda türkmen we bäsleşige gatnaşyjy döwletleriň dillerinde ýaňlanan aýdymlar dost-doganlyga, parahatçylyga çagyryşyň belent nusgasy boldy.
Halkara bäsleşigiň guramaçylyk topary daşary ýurtly gatnaşyjylaryň göwnejaý dynç almaklary üçin hem uly şertleri döretdiler. Gatnaşyjylar halkara bäsleşigiň çäklerinde paýtagtymyz Aşgabadyň gözel künjeklerine, Türkmen halysynyň milli muzeýine, Türkmenistanyň Döwlet medeniýet merkeziniň Döwlet muzeýine, şeýle-de paýtagtymyzdaky taryhy-medeni ýadygärlikler toplumyna, söwda we dynç alyş merkezlerine aýlanyp gördüler. Gezelençler myhmanlarda ýakymly täsirleri galdyrdy.
«Halkara gatnaşyklary: parahatçylyk dialogynyň medeniýeti» atly halkara bäsleşigiň şahsy tapgyrynyň netijelerine görä, gatnaşyjylar 21 altyn, 36 kümüş we 46 bürünç medal gazandylar. Şol sanda türkmen diplomatiýasynyň milli mekdebiniň talyplary 3 altyn we 8 kümüş medala mynasyp boldular. Şeýle-de halkara bäsleşigiň toparlaýyn tapgyrynda 3 topar altyn, 5 topar kümüş we 8 topar bürünç medal gazandy. Ýeri gelende aýtsak, toparlaýyn tapgyrda TDIM-iň Halkara gatnaşyklary institutynyň talyplaryndan düzülen 2 topar altyn medala mynasyp boldy.
Halkara bäsleşige Türkmenistanyň Magtymguly adyndaky Ýaşlar guramasynyň Merkezi geňeşi, Demokratik partiýasy, Kärdeşler arkalaşyklary, Senagatçylar we telekeçiler birleşmesi, Senagatçylar we telekeçiler partiýasy, «Aýdyň gijeler», «Türkmen Forum», «Saraýan», «Muhammet Balkan» hojalyk jemgyýetleri, «Agzybirlik tilsimaty» bilelikdäki kärhanasy, «Abadan haly» AGPJ, «Awtoýoly», «Täç Hil», «Ak menzil», «Röwşen», «Bir kuwwat», «Altyn tug», «Kämil ussat», «Erkin gurluşyk», «Mary travel» hususy kärhanalary, «Halkara audit» okuw merkezi we ykdysady jemgyýeti, «Ýedi dogan», «Bürgüt», «Düwmejik», «Ada production» studiýalary hemaýatkärlik etdiler.
Ýeňijileri sylaglamak we ýapylyş dabarasy özboluşly baýramçylyk ýagdaýyny döretdi. Halkara bäsleşigiň şahsy we toparlaýyn tapgyrlarynda ýeňiji bolan talyplara hem-de magistrlere guramaçylar tarapyndan Diplomlar, medallar, gymmatbahaly sowgatlar dabaraly ýagdaýda gowşuryldy. Ýeňijiler şeýle mümkinçilikleri döredýän, halkara ýaşlar hyzmatdaşlygyny ilerletmäge uly üns berýän türkmen halkynyň Milli Lideri Gahryman Arkadagymyza hem-de hormatly Prezidentimize tüýs ýürekden çykýan hoşallyk sözlerini beýan etdiler. Ýeňijileriň ýürek buýsançlary sungat ussatlarymyzyň ýerine ýetiren aýdym-sazlary bilen utgaşyp, dabara gatnaşanlara ruhubelentlik duýgusyny bagyşlady. Dürli dillerde ýaňlanan aýdym-sazlarda halklaryň arasyndaky dostluk, hoşniýetlilik, parahatçylyk söýüjilik ýörelgeleri öz beýanyny tapdy.
Ýurdumyzda bu halkara bäsleşigiň ilkinji gezek geçirilmegi halkara gatnaşyklarynda strategiki meseleleri derňemek, talyplaryň bilimlerini çuňlaşdyrmak, ylmy-barlaglarda ukyp-başarnyklaryny ýüze çykarmak zerurlygyndan, şeýle hem ählumumy parahatçylyk ýörelgelerini giňden wagyz etmek işlerini geçirmek, daşary ýurtly ugurdaş hünärmenler bilen ýakyn hyzmatdaşlyk gatnaşyklaryny ýola goýmak hem halkara ýaşlar hyzmatdaşlygynyň ösdürilmegine gönükdirilendir. Şeýle-de BMG-niň Baş Assambleýasynyň 78-nji mejlisinde Türkmenistanyň başlangyjy boýunça kabul edilen «2025-nji ýyl — Halkara parahatçylyk we ynanyşmak ýyly» atly Kararnamadaky parahatsöýüjilik, ynanyşmagy we özara dialogy berkitmek baradaky tagallalary wagyz etmek ýörelgelerinden gözbaş alýan bu halkara bäsleşik ýurtlaryň arasyndaky ylym-bilim ugurly gatnaşyklaryň ähmiýetini has-da artdyrdy.
Ogulmaýsa AMANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň
nazaryýeti we amalyýeti kafedrasynyň mugallymy.
Bu barada şu ýerde hem okap bilersiňiz: