Aşgabat – Daşkent: bilermenleriň arasyndaky hyzmatdaşlygyň çuňlaşdyrylmagy
2022-nji ýylyň 12-nji iýulynda Hormatly Prezidentimiz Serdar Berdimuhamedowyň Özbegistan Respublikasyna ilkinji döwlet saparynyň öňüsyrasynda Daşkent şäherinde Merkezi Aziýanyň halkara institutynyň gurnamagynda “Özbegistan we Türkmenistan: hyzmatdaşlygyň täze taryhy eýýamynda ösüşiň gelejegi” atly halkara maslahaty geçirildi. Bu maslahata türkmen wekiliýeti hökmünde Türkmenistanyň Daşary işler ministrliginiň Halkara gatnaşyklary institutynyň rektory J.Gurbangeldiýew, Halkara ynsanperwer ylymlary we ösüş uniwersitetiniň rektory E.Aýdogdyýew, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň direktory D.Orazsähedow, Halkara gatnaşyklary institutynyň Strategik barlaglar boýunça ylmy merkeziniň başlygy Ş.Şiriýew we merkeziň ylmy işgäri D.Mämmedow, şeýle hem institutyň Halkara gatnaşyklary we diplomatiýa kafedrasynyň mugallymy M.Berdinyýazow gatnaşdylar. Özbek tarapyndan bolsa, maslahatyň işine Özbegistanyň seljeriş barlaglar we ylmy edaralarynyň bilermenleri, Oliý Majlisiniň we Respublikan türkmen medeniýet merkeziniň wekilleri gatnaşdylar.
Maslahatyň açylyşy Merkezi Aziýanyň halkara institutynyň direktory A.Nasirowyň we Halkara gatnaşyklary institutynyň rektory J.Gurbangeldiýewiň giriş sözlerinden başlady. Soňra maslahatyň işi iki bölümçede dowam etdi. Birinji bölümçäniň dowamynda Türkmenistanyň we Özbegistan Respublikasynyň arasyndaky syýasy, ykdysady we söwda gatnaşyklary barada çykyşlar edildi, şeýle-de ulag we energetika pudaklarynda ikitaraplaýyn hyzmatdaşlygyny işjeňleşdirmek barada pikirler alşyldy. Ikinji bölümçede iki dostlukly ýurduň arasyndaky medeni hem-de durmuş-ynsanperwer gatnaşyklary barada bilermenler öz garaýyşlaryny beýan etdiler. Maslahatyň gidişi ýerli köpçülikleýin habar beriş serişdeleri tarapyndan şöhlelendirildi.
Maslahatyň ahyrynda Merkezi Aziýanyň halkara institutynyň hem-de Özbegistanyň Dünýä ykdysadyýeti we diplomatiýa uniwersitetiniň kitaphanalary üçin Halkara gatnaşyklary instituty tarapyndan Türkmenistanyň daşary syýasaty we diplomatiýasy barada ylmy we okuw kitaplary gowşuryldy. Guramaçylar öz gezeginde “Merkezi Aziýada täze Özbegistan we sebit hyzmatdaşlyk” atly ylmy-usuly ýygyndysyny sowgat etdiler.
Günüň ikinji ýarymynda Daşkent şäherine iş sapary bilen gelen türkmen wekiliýetiniň agzalarynyň şäheriň gözel ýerlerine, şol sanda “Ýeňiş”, “Täze Özbegistan” we türkmen-özbek dostlugy “Aşgabat” seýilgählerine gezelenji gurnaldy.
Merdan BERDINYÝAZOW,
Türkmenistanyň DIM-niň
Halkara gatnaşyklary institutynyň
mugallymy
Şeýle hem bu barada şu ýerden okap bilersiňiz!