Arzuwlaryň zandynda hasyl bolmak bar
Türkmenistanyň Halk Maslahatynyň Başlygy,
Türkmen halkynyň Milli Lideri
Gurbanguly BERDIMUHAMEDOW:
— Biziň topragymyzda ýene-de dünýä ylmynda iňňän wajyp ähmiýetli açyşlary edip, şamçyrag – ýolgörkeziji boljak eserleri döretjek birunylaryň,
lukman hekimleriň, mäne babalaryň, horezmileriň, arabylaryň, merwezileriň, amulylaryň,
zamahşarylaryň, kubralaryň, nesewileriň, massonlaryň we sarianidileriň, jykyýewleriň hem atanyýazowlaryň dörejekdigine men berk ynanýaryn.
Wysallaryň ak köşgüne yhlas atly ýodalar alyp barýar. Eziz Watanymyz ynsanlaryň arzyly maksatlarynyň myrat tapýan ýurdy. Bu jenneti mekan ülkede ýaşap, onuň ösüşlerine mynasyp goşant goşmak, abraý-mertebesini Ýer ýüzünde has-da belende galdyrmak her bir türkmen raýatynyň baş maksady bolup durýar. 2023-2024-nji okuw ýylynda Türkmenistanyň Daşary işler ministrliginiň Halkara gatnaşyklary institutyna talyplyga kabul edilen — diplomatiýany özlerine hünär edinip, eziz Diýarymyzyň hyzmatynda gaýym durjak bagtyýar talyplaryň hatarynda «Parahatçylygyň ýaş çaparlary» atly akylpaýhas bäsleşiginiň ýeňijilerini görmek örän buýsançly. Olar arzyly pellehana menzilme-menzil ýetip geldiler...
Badalga alan gününden bäri gerimi barha giňeýän «Parahatçylygyň ýaş çaparlary» atly akyl-paýhas bäsleşigine gatnaşmaga isleg bildirýän zehinli okuwçy ýaşlaryň sany ýyl-ýyldan artýar. Bäsleşik mekdep okuwçylarynyň müňlerçesini kitaba imrindirip, bilim ýoluny arçaýar. Bäsleşigiň I möwsümi türkmen döwletleriniň taryhyny öz içine alýan sowalnamalardan düzülen bolsa, II möwsümde taryhda bolup geçen bäş siwilizasiýadan habar soraýan sowalnamalar boýunça ýaş çaparlar güýç synanyşdylar. II möwsümde oňa gatnaşyjylar bäsleşigiň täze goşulan şerti — soraglara iňlis dilinde kämil, takyk jogap bermegi-de başardylar. Bu bolsa türkmen diplomatiýasynyň geljegi bolan ýaş çaparlaryň dil taýýarlyklarynyň ýokarydygyny görkezdi.
Öňümizde sabyrsyzlyk bilen garaşylýan III möwsüm. Bu möwsümiň «Beýik Magtymguly Pyragynyň taglymaty — umumadamzat gymmatlyklarynyň milli şamçyragy» atly şygar astynda geçirilmegi, eýýämden oýnuň beýlekilerden görnetin tapawutlanyp, şahyrana, täsirli geçjeginden habar berýär. Berilýän soraglar diňe maglumat häsiýetli bolman, logiki pikirlenmegi hem talap edýär. Bäsleşik üçin saýlanyp alynýan temalar, teklip edilýän edebiýatlar oýna gatnaşyjylara taýýarlyk döwründe bilimlerini artdyrmaga, dürli döwletleriň diplomatik däpleri, medeniýeti, syýasat bilen has ýakyndan tanyşmaga itergi berýär. Bäsleşigiň geçirilýän ýeri bolan ýaş diplomatlary taýýarlaýan ýokary okuw mekdebiniň «Ak öý» binasynyň bezeginiň oýunlaryň temasy bilen utgaşdyrylmagy bellenilmäge mynasypdyr.
Ökdeleri öňe saýlaýan bu bäsleşikde guramaçylyga jogapkär mugallymlaryň, baý tejribe goruna eýe emin agzalarynyň uly orny bar. Belläp geçmeli zatlaryň biri-de, I möwsümde ýeňiji bolan ýaş çaparlar II möwsümiň gatnaşyjylaryny talyp bolup garşy aldylar. Bäsleşige gezekli-gezegine alypbaryjylyk eden ýeňiji talyplar oýnuň guramaçylygynyň aglaba bölegini höwes bilen öz gerdenlerine aldylar. Bu oýnuň girim-çykymyndan habarly ýeňiji talyplar bäsleşige gatnaşýanlaryň tolgunmalaryny deň paýlaşdylar.
2023-2024-nji täze okuw ýylynyň bosagasynda parahatçylygyň ýaş çaparlarynyň 11-isi döşleri medally institutyň gapysyndan ätlediler. Köpçülikleýin habar beriş serişdeleriniň aglabasynda talyplyk buýsanjyny okyjylar köpçüligi bilen paýlaşan ýaş çaparlar indi halkaraçy hünärmenler bolup ýetişmäge aýgytly gadam urýarlar. Olaryň arasynda bäsleşigiň iki möwsümine gatnaşanlary-da bar. Halkymyzda «Ýykylan göreşden doýmaz» diýilýär. Ýöne Yhlas birinji möwsümde hem ýykylmandy. Ol arzyly I orny eýeledi. Bellenen menzil Baş baýrak bolansoň, Yhlas yhlas etdi. Bu gün — Bilimler we talyp ýaşlar gününde biz Yhlas bilen bir hatarda, eginleri «Talyp – 2023» ýazgyly ýene-de 10 sany «Parahatçylygyň ýaş çaparlary» atly akyl-paýhas bäsleşigiň ýeňijisini talyplyk bagty bilen gutladyk. Goý, parahatçylygyň ýaş çaparlarynyň al-asmanda perwaz urýan ak kepderiler kimin ýollary ak bolsun!
Aýşirin DÖWLETOWA,
Halkara žurnalistikasy fakultetiniň II ýyl talyby.