“AKYLLY” TEHNOLOGIÝALARYŇ ÄHMIÝETINE BAGYŞLANAN OKUW-USULY SEMINAR GEÇIRILDI
2026-njy ýylyň 8-nji oktýabrynda Türkmenistanyň Daşary işler ministrliginiň Halkara gatnaşyklary institutynda Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň 2026-njy ýylyň 2-nji sentýabrynda Arkadag şäheriniň Ruhyýet köşgünde geçiren umumy okuw sapagyndan gelip çykýan wezipeleri ýerine ýetirmek maksady bilen, okuw-usuly seminar geçirildi. Seminara ýokary okuw mekdepleriniň professor-mugallymlary gatnaşdylar.
Okuw-usuly seminarda institutyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň doktory Begenç Karaýew «Akylly» tehnologiýalaryň durnukly ösüşi üpjün etmekdäki ähmiýetli orny» atly tema boýunça çykyş etdi. Mugallym öz çykyşynda ýurdumyzyň milli ykdysadyýetiniň pudaklarynda sanly ulgamlar, «akylly» we «ýaşyl» tehnologiýalar ornaşdyrylyp, emeli aň mümkinçiliklerinden peýdalanylýandygy barada belledi. Mundan başga-da, «akylly» tehnologiýalaryň adamlaryň gündelik durmuşyna edýän täsiri, durnukly binagärlik we şäher taslamalary, energiýanyň gaýtadan dikeldilýän çeşmeleriniň özara utgaşdyrylmagy, kiberhowpsuzlyk ýaly meseleler barada nygtaldy.
Seminarda Milli Liderimiziň okuw sapagynda bellän «akylly» şäherleri döretmek hem-de «Akylly jemgyýet» konsepsiýasynyň taslamasyny düzmek hakyndaky pikirleri barada giňişleýin gürrüň edilip, gyzykly sorag-jogap alyşmalar işjeň alnyp baryldy.
Begenç GURBANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 2-nji ýyl talyby