AKYL-PAÝHAS BÄSLEŞIGINIŇ IV MÖWSÜMINIŇ II SAÝLAMA OÝNY
2024-nji ýylyň 20-nji noýabrynda Türkmenistanyň Daşary işler ministrliginiň Halkara gatnaşyklary institutynyň garamagyndaky Ýaş diplomatlaryň mekdebiniň guramagynda mekdep okuwçylarynyň arasynda «Parahatçylygyň ýaş çaparlary» akyl-paýhas bäsleşiginiň «Bitarap Türkmenistanyň parahatçylyk döredijilik diplomatiýasy: netijeli hyzmatdaşlygyň we durnukly ösüşiň ygtybarly guraly» atly şygar bilen geçirilýän IV möwsüminiň II saýlama oýny geçirildi.
Akyl-paýhas bäsleşiginiň IV möwsüminiň II saýlama oýnuna Aşgabat şäheriniň daşary ýurt dillerine we ynsançylyk ugurly okuw derslerine ýöriteleşdirilen 143-nji orta mekdebiniň 11-nji synp okuwçysy Permanmyrat Amanmyradow, Balkan welaýatynyň Balkanabat şäheriniň daşary ýurt dillerine ýöriteleşdirilen 22-nji orta mekdebiniň 11-nji synp okuwçysy Gülöwser Baýlyýewa, Lebap welaýatynyň Çärjew etrabynyň 31-nji orta mekdebiniň 11-nji synp okuwçysy Leýli Berkeliýewa, Aşgabat şäherindäki ýöriteleşdirilen 97-nji orta mekdebiniň 12-nji synp okuwçysy Aýşat Gaýypowa, Aşgabat şäherindäki Saparmyrat Türkmenbaşy adyndaky ýöriteleşdirilen umumy bilim berýän mekdep-internatynyň 11-nji synp okuwçysy Jeýhun Hojageldiýew, Ahal welaýatynyň Babadaýhan etrabynyň 17-nji orta mekdebiniň 11-nji synp okuwçysy Kowus Geldimyradow, Aşgabat şäherindäki Türkmenistanyň Gahrymany Atamyrat Nyýazow adyndaky Zehinli ýaşlar mekdebiniň 11-nji synp okuwçysy Leýla Jumageldiýewa, Daşoguz welaýatynyň Daşoguz şäherindäki daşary ýurt dillerine ýöriteleşdirilen 24-nji orta mekdebiniň 11-nji synp okuwçysy Agamyrat Gulmedow dagy gatnaşdylar.
Akyl-paýhas bäsleşiginiň IV möwsüminiň II saýlama oýnuna «Pähimdarlar geňeşiniň» agzalary hökmünde Magtymguly adyndaky Türkmen döwlet uniwersitetiniň Arheologiýa we etnologiýa kafedrasynyň müdiri, taryh ylymlarynyň kandidaty Mähri Perdeliýewa, Türkmenistanyň Daşary işler ministrliginiň Halkara gatnaşyklary institutynyň uly mugallymy, filosofiýa ylymlarynyň kandidaty Begenç Karaýew, Türkmen döwlet maliýe institutynyň Jemgyýeti öwreniş ylymlary kafedrasynyň müdiri, taryh ylymlarynyň kandidaty, professor, Türkmenistanyň «Hormatly il ýaşulusy» Meretguly Öwlüýägulyýew dagy adalatly eminlik etdiler.
«Parahatçylygyň ýaş çaparlary» akyl-paýhas bäsleşiginiň IV möwsüminiň II saýlama oýnunyň ýeňijileri diýlip Aşgabat şäheriniň daşary ýurt dillerine we ynsançylyk ugurly okuw derslerine ýöriteleşdirilen 143-nji orta mekdebiniň 11-nji synp okuwçysy Permanmyrat Amanmyradow we Aşgabat şäherindäki Saparmyrat Türkmenbaşy adyndaky ýöriteleşdirilen umumy bilim berýän mekdep-internatynyň 11-nji synp okuwçysy Jeýhun Hojageldiýew yglan edildi.
Akyl-paýhas bäsleşiginiň IV möwsüminiň II saýlama oýnuna Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Milli ýaý atyjylyk federasiýasy hemaýatkärlik etdiler. Ýeňijiler we bäsleşige gatnaşyjylar hemaýatkärler tarapyndan taýýarlanylan ýadygärlik sowgatlar bilen sylaglandylar. Şeýle-de olara institutymyzyň degişli Şahadatnamalary we Hormat hatlary gowşuryldy.
«Parahatçylygyň ýaş çaparlary» atly akyl-paýhas bäsleşiginiň IV möwsüminiň II saýlama oýny Türkmenistanyň Telewideniýe, radiogepleşikler we kinematografiýa baradaky döwlet komitetiniň «Miras» teleradioýaýlymy bilen institutyň okuw studiýasy tarapyndan bilelikde ýazgy edildi. Bäsleşik ýakyn günlerde «Miras» teleýaýlymynda tomaşaçylara ýetiriler.
Orazjemal ÇARYÝAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.