Adam gynamalaryň pidalaryna goldaw bermegiň Halkara güni
Her ýyl dünýäde müňlerçe adam jenýatçylykly süteme, gynamalara sezewar bolýar. Şeýle hereketleriň öňüni almak, ejir çekenleri ruhy saglygyna gowuşdyrmak we olary goldamak maksatly iýun aýynyň 26-sy, Birleşen Milletler Guramasy tarapyndan “Adam gynamalaryň pidalaryna goldaw bermegiň halkara güni” diýlip kabul edildi. Bu sene gynamalaryň pidalaryna, adam mertebisiniň kemsidilmeginiň öňüni almaga we şeýle jenaýatçylykly hereketlere garşy durmaga mümkinçilik döredýär. Häzirki wagtda islendik şertde ynsana ejir çekdirmek, sütem etmek, gynamak ýazgarylýar.
Bu sene dünýä jemgyýetinde ilkinji gezek 1998-nji ýylda bellenildi, 2016-njy ýylda bolsa, Bosniýa we Gersegowinada milli baýramçylyk hökmünde ykrar edildi.
Berkarar Watanymyzda adam gynamalara hem-de jenaýatçylykly hereketlere garşy aýgytly göreş alnyp barylýar. 2020-nji ýylda geçirilen halkara barlaglaryň netijesinde, dünýäniň ýaşamak üçin iň howpsuz ýurtlarynyň hatarynda Türkmenistanyň birinji orna laýyk görülmegi bolsa, ýurdumyzda adam hukuklaryny goramaga nä derejede ýokary ähmiýet berilýändiginiň aýdyň subutnamasydyr.
Rahym ŞAMEÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.