9-njy oktýabr – Bütindünýä poçta güni
Bir wagtlar dünýäniň dürli künjeklerinde adamlar internet, sosial ulgamlar arkaly hat, habar (SMS - gysga habar hyzmaty) iberip we alyp bilmändirler. Öň häzirki zaman aragatnaşyk serişdeleri bolmadyk döwürde - internet, modem, sosial ulgamlar, hat iberjek adamlar poçta hyzmaty bilen habarlaşyp, jogap hatyna köp garaşypdyrlar. Bu hatlar bellenen salgylara pyýada, atda ýa-da welosipedde ýörite poçta kurýerleri arkaly gowşurylypdyr. Tehnikanyň ösmegi bilen şahsy kompýuter (HK), faks, e-poçta, sosial ulgamlar ýaly ýokary tehnologiýalar durmuşymyza girendigine garamazdan, gündelik durmuşymyzda poçta hyzmatlaryny häli-şindi ulanýarys. Häzirki wagtda döwrebap poçta gullugy ylmy we tehnologiki ösüşler (YTÖ) bilen deň gelýär. Dünýäde köp adamlar biri-birleri bilen aragatnaşygy saklamak üçin poçta hyzmatyndan peýdalanýarlar. Poçta gullugy bolsa gün geldigiçe kämilleşip, bize köp mümkinçilikleri hödürleýär. Şonuň üçin her ýyl Bütindünýä poçta güni bellenilýär. Bu bize poçta hyzmatlarynyň we işgärleriniň bahasyna ýetip bolmajak işine dogry düşünmäge hem-de baha bermäge mümkinçilik berýär.
Taryhy maglumatlara ser salanymyzda, Bütindünýä poçta güni 1969-njy ýylyň 9-njy oktýabryndan bäri dünýä halklary tarapyndan giňden bellenilip başlanýar. Bu sene Ählumumy Poçta Bileleşiginiň (UPU) 1874-nji ýylda Şweýsariýanyň paýtagty Bern şäherinde işe başlan gününiň hormatyna bellenilýär. Ählumumy Poçta Bileleşigi (UPU) 1948-nji ýylda Birleşen Milletler Guramasynyň agentligine öwrülýär. Bu günde dünýäniň birnäçe ýurtlarynda, esasan-da Ählumumy Poçta Bileleşigine girýän döwletlerde poçta bölümleri täze poçta önümlerini we hyzmatlaryny hödürlemek ýa-da gowulandyrmak üçin sergilerdir auksionlar ýaly gyzykly çäreler geçirilýär.
Şeýle-de UPU Bütindünýä poçta güni mynasybetli her ýyl ýaşlar üçin halkara hat ýazmak boýunça ýaryş gurnaýar. Her ýyl bu ýaryşyň öz temasy bolýar. Mysal üçin, 2014-nji ýylda “Sazyň durmuşa edýän täsiri”, 2021-nji ýylda “Dikeldiş üçin innowasiýa” – diýip atlandyrylýar.
Döwletýar ARÇAMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 1-nji ýyl talyby.