3-nji iýun — Bütindünýä welosiped güni
2022-nji ýylyň 3-nji iýunynda Bütindünýä welosiped güni mynasybetli dabaraly welosiped ýörişi geçirildi. Ýurdumyzyň bagtyýar raýatlarynyň gatnaşmagynda geçirilen dabaraly ýörişler eziz Diýarymyzyň ähli künjeginde uly şatlyk-şowhuna beslendi. Bu asylly çärä Türkmenistanyň Daşary işler ministrliginiň Halkara gatnaşyklary institutynyň talyp ýaşlary, professor mugallymlary hem işjeň gatnaşdylar.
Hormatly Prezidentimiz ilat arasynda köpçülikleýin bedenterbiýe we sport çärelerini ýaýbaňlandyrmagy asylly däbe öwürdi. Ýurdumyzyň dürli künjeklerinde döwrebap sport desgalarynyň ulanylmaga berilmegi we medeni-dynç alyş zolaklarynyň barha artmagy raýatlaryň arasynda sagdyn durmuş ýörelgelerini ornaşdyrmaga, olary köpçülikleýin sport çärelerine işjeň çekmäge giň mümkinçilikleri berýär.
Gahryman Arkadagymyzyň başlangyjy boýunça 2018-nji ýylda Birleşen Milletler Guramasynyň Baş Assambleýasynyň Kararnamasy esasynda her ýylyň 3-nji iýunynyň Bütindünýä welosiped güni diýlip yglan edilmegi ýurdumyzyň bedenterbiýe-sagaldyş we sport hereketini ösdürmäge milli, sebit hem-de ählumumy möçberde jemgyýetiň ekologiýa medeniýetini kämilleşdirmäge goşýan ägirt uly goşandynyň ýokary bahasynyň subutnamasyna öwrüldi.
Türkmenistanyň işjeň tagallalary bilen 2022-nji ýylyň 15-nji martynda Birleşen Milletler Guramasynyň Baş Assambleýasy özüniň 76-njy sessiýasynyň 61-nji plenar mejlisinde «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamany kabul etdi. Bu şatlykly hoş habar dünýä bileleşiginiň Türkmenistanyň başlangyçlaryny goldaýanlygynyň ýene bir gezek aýdyňlygy bilen görkezdi. Bu bolsa hormatly Prezidentimiziň alyp barýan daşary syýasatynyň we ekologiýa diplomatiýasynyň diňe bir biziň halkymyzyň bähbidine däl, eýsem-de tutuş dünýä halklarynyň, bütin adamzadyň bähbidine gönükdirilendiginiň beýanyna öwrüldi.
Paýtagtymyzyň Çandybil şaýolunyň we Bekrewe köçesiniň çatrygynda gurlan hem-de Aşgabadyň özboluşly ajaýyplygyna öwrülen Welosiped binasy bu baýramçylygyň aýdyň nyşany boldy. Bu täsin binada Beýik Ýüpek ýolunyň gaýtadan dikeldilmeginiň ähmiýeti, sebit we halkara hyzmatdaşlygy ösdürmekde ýetilen belent sepgitler öz beýanyny tapdy.
Şu ýerde 2018-nji ýylda köpugurly «Aşgabat» stadionynda 3 müň 246 adamyň gatnaşmagynda welosiped sporty boýunça köpçülikleýin tälim beriş sapagynyň geçirilendigini ýatlamak bolar. Şondan bir ýyl geçenden soň, Olimpiýa şäherçesinde «Iň dowamly, bir nyzamly welosipedli ýörişi» geçirildi. Oňa welosipedçileriň 2019-sy gatnaşdy. Bu çäreleriň ikisi hem Ginnesiň Bütindünýä rekordlar kitabyna girizildi. Bularyň ählisi sport döwleti hökmünde Garaşsyz, baky Bitarap Watanymyzyň abraýynyň barha artýandygynyň aýdyň subutnamasydyr.
Meňli HOJAMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.