3-nji iýun –Bütindünýä welosiped güni
Häzirki wagtda ýurdumyzda hormatly Prezidentimiziň parasatly baştutanlygynda welosiped sportunyň ösdürilmegine uly üns berilýär. Welosiped sporty beden we psihiki sagdynlygy, fiziki işjeňligi gowulandyrmagyň möhüm serişdesi bolup hyzmat edýär. Welosiped dünýäde iň köp ýaýran ulag serişdesi hasaplanylýar. Munuň bilen baglanyşykly, Birleşen Milletler Guramasynyň Baş Assambleýasynyň 72-nji sessiýasynyň 2018-nji ýylyň 12-nji aprelinde bolup geçen 82-nji mejlisinde Türkmenistanyň başlangyjy bilen degişli Kararnama kabul edilip, Bütindünýä welosiped güni döredilýär. Ýurdumyzda her ýylyň 3-nji iýunynda Bütindünýä welosiped gününi bellemek asylly däbe öwrülip, ýokary derejede alnyp barylýar.
“Welosiped” latyn sözi bolup, “velox”- “çalt”, “pedis”-“aýak” diýen sözleriň jeminden emele gelipdir. Adyndan belli bolşy ýaly, sportuň bu görnüşinde aýagyň dyz we daban bölekleri has köp işjeňlikde bolýar. Welosport bilen meşgullanmak adamyň gan aýlanşygynyň we öýkende amala aşýan dem alyş hadysasynyň has-da gowulanmagyna, dürli keselleriň döremek howpunyň azalmagyna öz täsirini ýetirýär. Aşgabatda ilkinji welosipedçiler jemgyýeti 1894-nji ýylda döredilýär.Bu jemgyýetiň welosipedçileriniň ilkinji ýaryşy 1895-nji ýylda geçirilipdir.
Köpçülikleýin welosipedli ýöreşleri geçirmek ýörelgämize öwrülip, milli Liderimiziň hut özüniň watandaşlarymyz bilen bilelikde köpçülikleýin çärelere gatnaşýandygy ýurdumyzda sagaldyş heretleriniň ösdürilmegine, welosiped sporty bilen meşgullanýanlaryň sanynyň artmagyna, täze ekologiýa garaýyşlarynyň kemala gelmegine, daşky gurşawy gorap saklamaga jemgyýetiň jogapkärçiliginiň ýokarlanmagyna çagyryş bolup durýar.
Seýitnur HASANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.