26-njy iýun - Neşe serişdeleriniň sarp edilmegine we bikanun dolanyşygyna garşy göreşmegiň halkara güni
1987-nji ýylyň 7-nji dekabrynda BMG-niň Baş Assambleýasynyň 42-nji sessiýasynda her ýylyň 26-njy iýunyny Neşe serişdeleriniň sarp edilmegine, ýaýradylmagyna we bikanun dolanyşygyna garşy göreşmegiň halkara gününi bellemek barada Kararnama kabul etdi. Bu Kararnamanyň kabul edilmeginiň esasy maksady dünýäde neşe serişdeleriniň ulanmaklygyň, şeýle hem olary bikanun dolandyrmaklygyň öňüni almak üçin dünýä jemgyýetçiligini işeňňir gatnaşmaklyga çagyrmakdyr.
Türkmenistan neşe serişdeleriniň ýaýradylmagyna garşy aýgytly göreşmegi durmuşa geçirýän döwlet syýasatynyň ileri tutulýan ugry hökmünde kesgitläp, häzirki wagtda beýleki ýurtlar üçin mynasyp görelde döwlet hökmünde çykyş edýär. Ýurdumyz BMG-niň Neşe serişdeleriniň we psihotrop maddalarynyň bikanun dolanyşygyna garşy göreş baradaky halkara Konwensiýalaryna hem-de BMG-niň Neşeler we jenaýatçylyk boýunça müdirliginiň hem-de Ýewropa Bileleşiginiň sebitleýin we halkara taslamalaryna we maksatnamalaryna gatnaşýar. Bu ugurda alnyp barylýan işleriň esasy wezipesi neşeleriň bikanun dolanyşygyna garşy göreşmekdäki, neşe serişdelerini ele salmak maksady bilen serhet gözegçiligini güýçlendirmekdäki tagallalary birikdirmekden, harby we hukuk goraýjy edaralaryň işgärlerine tehniki taýdan kömek bermekden we okatmakdan ybaratdyr.
Hormatly Prezidentimiziň ýolbaşçylygynda işlenip taýýarlanylan maksatnamalaryna laýyklykda, neşekeşlige garşy göreşmek we ýüze çykarmak, neşe serişdelerini ulanmaga ýykgyn edýän adamlary bejermek boýunça giň möçberli işler alnyp barylýar. “Neşe serişdelerine, psihotrop maddalara, prekursorlara we bularyň bikanun dolanyşygyna garşy göreşmek boýunça çäreler hakynda” kabul edilen Türkmenistanyň Kanuny hem alnyp barylýan işleriniň aýdyň subutnamasydyr. Neşekeşligiň öňüni almak boýunça çäreleriň yzygiderli esasda geçirilmegi oňyn netijeleri berýär. Bu çärelere ähli düzümler, şol sanda saglygy goraýyş we bilim edaralary, jemgyýetçilik guramalary hem-de köpçülikleýin habar beriş serişdeleri işjeň gatnaşýarlar.
Sagdyn durmuş ýörelgesini, köpçülikleýin bedenterbiýäni we sporty işjeň wagyz etmek boýunça maksatnamanyň durmuşa geçirilmegine döwlet tarapyndan uly goldaw berilmegi bu ugurda alnyp barylýan işleriň ähmiýetini has-da ýokarlandyrýar. Häzirki döwürde ýurdumyzyň ähli sebitlerinde häzirki zaman stadionlary, bedenterbiýe-sagaldyş toplumlary, sport zallary we ýüzüş howuzlary bolan täze mekdepler hereket edýär.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş
kafedrasynyň uly mugallymy