24-nji oktýabr – Bütindünýä ösüş barada maglumatlaryň güni
Her ýylyň 24-nji oktýabrynda Birleşen Milletler Guramasy tarapyndan tassyklanan Bütindünýä ösüş barada maglumatlaryň güni 1972-nji ýyldan bäri bellenilýär. BMG-niň Baş Assambleýasy bu günüň senesini 1970-nji ýylyň 24-nji oktýabrynda BMG-niň Ösüş On ýyllygy üçin Halkara Ösüş Strategiýasynyň kabul edilen senesi we BMG-niň döredilen gününe gabat gelmeli diýen karar bilen kesgitleýär. Bu günüň maksady, ösüş meseleleri we olary çözmek üçin halkara hyzmatdaşlygyny güýçlendirmek barada jemgyýetiň pikirini ösdürmekden ybarat.
Biz nädip jemgyýeti maglumat bilen üpjün edip bileris?
Elbetde, häzirki zaman tehnologiýalaryň, esasanam köpçülikleýin habar beriş serişdeleriniň (gazet-žurnallar, teleradioýaýlymlar) üsti bilen üpjün edip bileris. Sebäbi KHBS dünýäde bolup geçýän islendik wakany dogry hem doly şöhlelendirýän, jemgyýete täsir ediji, ynamdar ulgamdyr.
Dünýäde her ýurduň ösüşi onuň halkynyň ýaşaýyş-durmuşy bilen kesgitlenilýär. Ösüş hem öz gezeginde birnäçe görkezijilere daýanýar. Bu ugurdan esasy görkeziji bolsa ylym-bilim ulgamydyr. Şonuň üçin bilim ösüşiň açary hasaplanylýar.
Bütindünýä ösüş barada maglumatlaryň gününde BMG-niň ýolbaşçylygynda oňa agza döwletlerde dürli çäreler, ylmy konferensiýalar, ýygnaklar, maslahatlar geçirilýär. Ýygnaga gatnaşýan agzalar ýüze çykan meseleleri ara alyp maslahatlaşýarlar. Mysal üçin, 2005-2014-nji ýyllar aralygynda geçirilen seminarlarda ilkinji nobatda ara alnyp maslahatlaşylan tema: bilim bilen baglanyşykly ýüze çykýan meseleler bolupdy. Häzirki döwürde Adamzadyň ýaşaýşyna täsir edýän syýasy, ekologiýa we tehnologiýa ýaly döwrebap meseleler has-da köpeldi. Munuň özi ähli ýurduň ösüşine we ykdysadyýetine özüniň täsirini ýetirýär. Syýasat bilen baglanyşykly hökümetiň üýtgemegi, gender deňligi, howanyň üýtgemegi, açlyk we garyplyk ýaly meseleler döwletiň ösüşine uly zyýan ýetirýär. Bu meseleleriň öňüni almak we çözmek üçin dünýäde Birleşen Milletler Guramasy hereket edip, her ýylyň sentýabr aýynda Baş Assambleýanyň mejlisi geçirilýär. Onda umumadamzat meselelere garalýar. Her ýylda geçirilýän bu mejlise hormatly Prezidentimiziň ýolbaşçylygynda Türkmenistan hem gatnaşyp, Adamzada howp salýan meseleler barada umumadamzat bähbitli teklipler bilen çykyş edýär.
Şeýle-de Türkmenistan hem öz gezeginde Bütindünýä ösüşiň maglumatlar gününde döwletimiziň syýasy we medeni taýdan ösüşini ileri tutýanlygyny görkezmek, ýurdumyzyň Garaşsyzlyk döwründe ýeten belent sepgitleri barada seminarlary, halkara ylmy konferensiýalary, maslahatlary geçirýär.
Döwletýar ARÇAMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.