15-nji aprel — Halkara medeniýet güni
Ähli ulgamlarda, ähli belentlikleriň sakasynda medeniýet we sungat bar. Medeniýet ynsanyýete ruhy gözellik bagyş edýär. Aslynda, sanskrit dilinde «medeniýet» sözi gözelligi we öz-özüňi kämilleşdirmek islegini aňladýan «ýagtylyga hormat» manysyny berýär.
Medeniýeti öwrenmek we hemişe goramak zerurdyr. Şonuň üçin ýörite baýramçylyk — Halkara medeniýet güni döredildi. Ol dünýä ýurtlarynda her ýylyň 15-nji aprelinde bellenip geçilýär. 1935-nji ýylyň 15-nji aprelinde «Çeper we ylmy guramalary hem-de taryhy ýadygärlikleri goramak barada» halkara şertnamasynyň ýa-da «Rerih şertnamasynyň» kabul edilmegi mynasybetli döredilen bu baýram medeniýeti we sungaty wagyz etmekde möhüm başlangyçdyr.
Ýeri gelende bellesek, meşhur rus suratkeşi we filosofy Nikolas Rerih çeper ýadygärlikleri wagt we adamyň täsiri sebäpli weýran bolmakdan goramak pikiriniň awtorydyr. Agzalan şertnamada medeni gymmatlyklary goramak baradaky maddalar toplumy görkezilendir. Bu maddalaryň uruş ýagdaýlarynyň dowam edýänligine hem garamazdan, islendik syýasy ýagdaýda berjaý edilmegi hökmanydyr.
Halkara medeniýet gününde dünýäde dürli çäreler — sergiler, döredijilik duşuşyklary, sungat konferensiýalary, taryhy leksiýalar, konsertler we teatr çykyşlary geçirilýär. Bu halkara baýram, sözüň doly manysynda, ýürekleri birleşdirip, duýgulary sözleşdirýän baýramdyr.
Bägül JUMAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.