ZEHINLI TALYPLARYŇ EKOLOGIÝA UGRUNDAKY YLMY ÝEŇŞI
2026-njy ýylyň 12-nji martynda Myrat Garryýew adyndaky Türkmenistanyň Döwlet lukmançylyk uniwersitetinde ýokary okuw mekdepleriniň talyplarynyň arasynda “Ekologiýa we daşky gurşawy goramak” dersi boýunça açyk internet olimpiadasy geçirildi. Bu bäsleşik Türkmenistanyň Prezidentiniň ýurdumyzda sanly bilim ulgamyny ösdürmek, tebigy hem-de takyk ylmy ugurlaryna degişli dersleri okatmagy kämilleşdirmek baradaky Konsepsiýalaryny durmuşa ornaşdyrmak maksady bilen guraldy. Sanly maglumat-kommunikasiýa tehnologiýalaryny ulanmak arkaly geçirilen bu olimpiada ýurdumyzyň 24 sany ýokary okuw mekdebinden zehinli talyplar gatnaşdylar.
Bu abraýly ders bäsleşiginde Türkmenistanyň Daşary işler ministrliginiň Halkara gatnaşyklary institutynyň talyplary hem uly üstünlikleri gazandylar. Institutyň Halkara ykdysady gatnaşyklary fakultetiniň 3-nji ýyl talyby Dawut Gezerow we Halkara gatnaşyklary fakultetiniň 3-nji ýyl talyby Sahydöwlet Hümmetjumaýew özleriniň ýokary bilim derejesini görkezip, 1-nji orna mynasyp boldular. Şeýle hem, Halkara gatnaşyklary fakultetiniň 4-nji ýyl talyby Hudaýberdi Rozykow bäsleşikde işjeňlik görkezip, Hormat haty bilen sylaglandy. Bu gazanylan ýeňişler ýurdumyzyň geljekki hünärmenleriniň daşky gurşawy goramaga we ekologiýa meselelerine bolan uly gyzyklanmasynyň hem-de ylmy taýýarlygynyň aýdyň kepilidir.
Aýmyrat MUHAMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 3-nji ýyl talyby.