YLYM-BILIM ULGAMYNY DÖWREBAPLAŞDYRMAKDA TÄZE ÄDIM
2026-njy ýylyň 3-nji fewralynda Türkmenistanyň Daşary işler ministrliginiň Halkara gatnaşyklary institutynda Koreýa Respublikasynyň Daşary işler ministrliginiň 2025-nji ýyl üçin kiçi göwrümli resmi kömek maksatnamasynyň (ODA) çäklerinde bu ýokary okuw mekdebine tehniki enjamlary we esbaplary gowşurmak boýunça duşuşyk geçirildi. Oňa Koreýa Respublikasynyň Türkmenistandaky Ilçihanasynyň wekilleri we institutyň ýolbaşçy düzümi gatnaşdy.
Duşuşygyň dowamynda iki ýurduň syýasy-diplomatik, ykdysady we medeni gatnaşyklarynyň ýokary derejesi barada bellenip geçildi. Şol gatnaşyklar deňhukuklylyk, özara hormat goýmak we hoşniýetli ýörelgeleri esasynda işjeň ösdürilip, soňky ýyllarda hil taýdan täze derejä çykaryldy. Koreýa Respublikasynyň Daşary işler ministrliginiň 2025-nji ýyl üçin kiçi göwrümli resmi kömek maksatnamasynyň (ODA) çäklerinde amala aşyrylan işler hem munuň aýdyň kepilidir.
Koreýa Respublikasynyň Daşary işler ministrliginiň 2025-nji ýyl üçin kiçi göwrümli resmi kömek (ODA) maksatnamasy bu döwletleriň arasyndaky diplomatik we ykdysady gatnaşyklary berkitmäge, esasan bilim we tehnologiýa pudagynda maddy-tehniki binýady döwrebaplaşdyrmaga gönükdirilen maksatnamadyr. Koreýa Respublikasy 2025-nji ýylda dünýä derejesinde ODA üçin ýokary derejede — takmynan 6,5 trillion won (4,8 milliard amerikan dollar töweregi) serişde böldi.
Türkmenistan bilen hyzmatdaşlykda bu maksatnamanyň wezipesi iki ýurduň arasyndaky hyzmatdaşlygy has-da çuňlaşdyrmakdan, Koreýanyň ösen tehnologiýalaryny Türkmenistanyň edaralaryna ornaşdyrmakdan, ýaş hünärmenleriň häzirki zaman ülňülerine laýyk gelýän tehnologiýalar bilen işlemegine şert döretmekden ybaratdyr.
Merdan BERDINYÝAZOW,
Türkmenistanyň Daşary işler ministrliginiň
Halkara gatnaşyklary institutynyň uly mugallymy.
Bu barada şu ýerde hem okap bilersiňiz: