Ýeňişleriň Dürdänesi
Okuwymyzyň irdenki nyzamyny tamamlap, sapagymyza barýan wagtymyz öňümizden çykan Dürdänäniň deňinden her kim «Gutlaýas, çempion!» diýip geçýärdi. Bu mylaýym gyza daşyndan seredip, eger-eger onuň karate boýunça Ýewraziýanyň çempionydygyna ynanyp bilmersiň. Ol şeýle bir çekinjeň welin, walla, haýran galaýmaly. Ýöne, tutluşyk meýdançasynda welin, garşydaşlary ondan çekinýär.
Çaga göwnüniň islegi. Ynha, Dürdänäniň karate bilen meşgullanyp başlamagynyň baş sebäbi. «Ýüregiňizi diňläň!» diýleni. Çünki bu günki gün Dürdänäniň çagalykdaky saýlan şol ýoly ony sport äleminiň ýokary derejeli münberlerine eltdi. Hawa, Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň 3-nji ýyl talyby Dürdäne Nazargylyjowa bu gün karateniň dürli görnüşleri boýunça Türkmenistanyň birnäçe gezek çempiony, karate boýunça 1-nji derejeli sport ussadydyr.
Üstünlik sözüniň «üstün» sözünden kök alýandygy mälim. Bu diňe garşydaşyňdan däl, eýsem, ilki bilen, özüňden üstün çykmagy aňladýar. Mahlasy, garşydaşyndan üstün çykan ýeňiji, özünden üstün çykan çempion bolýar. Dürdänäniň hem uly üstünlikleriniň aňyrsynda irginsiz türgenleşikler ýatyr. Bir zat hemişe aýratyn ünsümi çekýär, uly üstünlik gazanan adamlaryň köpüsi özleri hakynda gürlemekden çekinegen bolýar. Dürdäne hem şeýle-dä. Ondan ýeňişleri hakynda soraýaň welin, jogap bermekden geçip, çekinjeňligi bilen ýylgyryp duruberýär.
2023-nji ýylda Türkiýäniň Stambul şäherinde geçirilen aşihara karate boýunça Ýewraziýanyň II açyk çempionatynda 21 — 24 ýaşly türgenleriň arasynda 65 kilograma çenli agram derejede Dürdäne çempion boldy. Häzirem ýadymda, biz bu habary eşidip, şeýle bir öz ýyllykdaşymyza buýsandyk. Aslynda, biziň okuwymyzda sportuň karate görnüşi boýunça dünýä we sebit çempionlary okaýar. Olardan Dawut Nazmyradowy, Ýusup Garajaýewy, Resul Atajanowy görkezmek bolar.
Ýakynda Dürdänäniň «Biznes reklama» gazetinde çap edilen söhbetdeşliginde ol öz üstünlikleri barada şeýle belläpdir: «Karate boýunça ýaryşlara 2015-nji ýyldan bäri gatnaşýaryn. Şu wagta çenli öz ýaş derejämde kýokişunkaý karate boýunça 3 gezek (2016, 2018, 2019) Türkmenistanyň çempiony, 2 gezek (2015, 2017) çempionatyň kümüş medalynyň eýesi boldum. Mundan başga-da, ýetginjekleriň we ýaşlaryň arasyndaky Türkmenistanyň çempionatynda karateniň kata görnüşi boýunça 2 gezek (2018, 2019), toparlaýyn kata boýunça hem 2 gezek (2018, 2019) 1-nji orna mynasyp boldum. Ulularyň arasyndaky Türkmenistanyň çempionatynda kýokişunkaý karate boýunça 2 gezek (2022, 2023) bürünç medal hem-de 1 gezek (2023) altyn medal gazandym. Şeýle-de ulularyň arasyndaky Türkmenistanyň çempionatynda 2022-nji ýylda karateniň kata görnüşi boýunça 3-nji orna, toparlaýyn kata boýunça bolsa 1-nji orna mynasyp boldum. Halkara ýaryşlar barada aýdanymyzda, 2023-nji ýylda Türkiýäniň Stambul şäherinde geçirilen aşihara karate boýunça Ýewraziýanyň II açyk çempionatynda 60 kilograma çenli agram derejede 18 — 21 ýaşly türgenleriň arasynda 2-nji orny, 21 — 24 ýaşly türgenleriň arasynda bolsa 65 kilograma çenli agram derejede 1-nji orny eýeledim».
Karateden başga-da, Dürdäne sportuň taýboks we kikboks görnüşleri bilen meşgullanýar. Ol Taýboks boýunça 2018-nji ýylda ýaşlaryň arasyndaky Türkmenistanyň çempionatynda 48 kilograma çenli agram derejede 3-nji orna, 2019-2020-nji ýyllarda bolsa ýaşlaryň arasynda 54 kilograma çenli agram derejede 2 gezek «Türkmenistanyň çempiony» diýen ada mynasyp bolýar. Şeýle-de, ulularyň arasyndaky Türkmenistanyň çempionatynda 2018-nji ýylda 1-nji orny, 2019-njy ýylda 2-nji orny eýeleýär. Mundan başga-da, Dürdäne kikboks boýunça 2018-nji ýylda ýaşlaryň arasyndaky Türkmenistanyň çempionatynda 48 kilograma çenli agram derejede 1-nji ýeri eýelemegi başarýar. Ynha, Dürdänäniň üstünlikleri şulardan ybarat. Ol birbada sportuň karate, taýboks hem-de kikboks görnüşleri boýunça ýurdumyzyň we halkara ýaryşlaryň çempionydyr. Biz hem oňa geljekki ýaryşlarda uly üstünlikleri arzuw edýäris. Dürdäne, çempionlyk hemişe ýaranyň bolsun!
Gurbansähet GURBANSÄHEDOW,
Halkara žurnalistikasy fakultetiniň
3-nji ýyl talyby.