ÝAŞLARY YLMA WE TELEKEÇILIK IŞLERINE ÇEKMEK BOÝUNÇA GEÇIRILEN BÄSLEŞIGIŇ JEMI JEMLENDI
2023-nji ýylyň 13-nji oktýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Senagatçylar we telekeçiler partiýasynyň Aşgabat şäher komitetiniň agzalary bilen geçirilen duşuşykda 2023-nji ýylyň 22-nji maýynda institutda tehnologik ösüş we bazar gatnaşyklaryna geçilýän döwürde ýaşlaryň giň toparyny telekeçilik işine çekmek boýunça ýaş oýlap tapyjylaryň arasynda geçirilen “Ösüşe ak ýol” atly ylmy bäsleşigiň jemi jemlendi. Bäsleşigiň jemi boýunça Türkmen döwlet ykdysadyýet we dolandyryş institutynyň talyplary Gyzylgül Ybraýymowa I derejeli diploma, Aýna Agamyradowa hem-de bu institutyň uly mugallymy Gadam Täçmuhammedow Hormat hatyna, Türkmenistanyň Daşary işler ministrliginiň Halkara gatnaşyklary institutynyň talyplary Farhat Şaripow, Jahangir Polatbaýew II derejeli we Ata Berdigylyjow III derejeli diploma, Türkmen döwlet maliýe institutynyň talyplary Oguljeren Halmuhammedowa we Aýjahan Rejepowa II derejeli diploma eýe boldular. Olara Türkmenistanyň Senagatçylar we telekeçiler partiýasy tarapyndan gymmat bahaly sowgatlar gowşuryldy.
Ýaşlaryň taslama tanyşdyrylyşyna telekeçiler gowy baha bermek bilen hödürlenen taslamalary kämilleşdirmek boýunça degişli maslahatlaryny berdiler. Olar häzirki döwürde Türkmenistanda ýaşlar baradaky döwlet syýasatynyň 2021-2025-nji ýyllar üçin Döwlet maksatnamasynyň çäklerinde ýaşlary telekeçilige çekmek barada degişli işleriň alnyp barylýandygyny bellediler. Ýaş ykdysatçylara uly ynam bildirip, ýurdumyzyň ydysady ösüşine saldamly goşant goşmagymyza döredip berýän giň mümkinçilikleri üçin Türkmen halkynyň milli Lideri Gahryman Arkadagymyzyň, Arkadagly Gahryman Serdarymyzyň il-ýurt bähbitli, umumadamzat ähmiýetli alyp barýan işleri elmydama rowaçlyklara beslensin!
Myrat MAKSADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara
ykdysady gatnaşyklary fakultetiniň I ýyl talyby.