ÝAŞLAR ÝYLYNYŇ ÜSTÜNLIKLI TAMAMLANMAGYNA BAGYŞLANAN HOŞALLYK MASLAHATY
Tamamlanyp gelýän 2023-nji ýylyň 27-nji dekabrynda Aşgabatda Söwda-senagat edarasynda Ýaşlaryň dabaraly maslahatynyň we sergisiniň geçirilen günlerinde ýylyň dowamynda ýurdumyzda hem-de daşary ýurtlarda geçirilen halkara sport ýaryşlarynda, mekdep okuwçylarynyň, talyp ýaşlaryň bäsleşiklerinde ýeňiji bolanlaryň, şeýle hem ykdysadyýetiň dürli ugurlarynda zähmet çekip, ýurdumyzyň ösüşine mynasyp goşant goşan ýaş hünärmenleriň Şa serpaýlary bilen sylaglanmagy ýaşlar syýasatynyň üstünlikli durmuşa geçýändiginiň aýdyň nyşanydyr.
Arkadag Serdarly bagtyýar ýaşlar ýylynyň dowamyndaky taryhy seneler döwletimiz tarapyndan ýaşlaryň bagtyýar durmuşy, abadan geljegi hakynda edilýän aladalarynyň, amala aşyrýan özgertmeleriniň näderejede giň gerime, uly ähmiýete, neneňsi gymmata eýedigini äşgär edýär.
2023-nji ýylyň 29-njy dekabrynda Türkmenistanyň Daşary işler ministrliginiň Halkara gatnaşyklary institutynda professor-mugallymlaryň, talyp ýaşlaryň gatnaşmagynda Gahryman Arkadagymyzyň, Arkadagly Gahryman Serdarymyzyň başlangyjy bilen yglan edilen Arkadag Serdarly bagtyýar ýaşlar ýylynyň üstünlikli jemlenmegine bagyşlanan hoşallyk maslahaty geçirildi. Maslahatda çykyş edenler ýurdumyzyň ýaşlar baradaky döwlet syýasatynda amala aşyrylýan işleriň esasy maksady, ýaşlar ýylynyň taryhyna altyn harplar bilen ýazylan syýasy-jemgyýetçilik wakalar dogrusynda, ýaşlaryň halkara hyzmatdaşlygy üçin döredilýän mümkinçilikler barada buýsançly aýtdylar. Maslahatyň ahyrynda oňa gatnaşyjylar, ýaşlara döredilýän giň gerimli mümkinçilikler üçin Gahryman Arkadagymyza we Arkadagly Gahryman Prezidentimize hoşallyk sözlerini beýan etmek bilen, täze 2024-nji ýylda hem ýaşlaryň üstünlikleriniň gadamlarynyň mundan beýläk-de batly bolmagy arzuw etdiler!
Kerim SERDAROW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III ýyl talyby.