“Ýaşlar - ýurdumyzyň ylmy kuwwaty” atly baýramçylyk dabarasy geçirildi
2023-nji ýylyň 5-nji iýunynda Ylymlar güni mynasybetli Türkmenistanyň Daşary işler ministrliginiň Halkara gatnaşyklary institutynda ýurdumyzyň harby we hukuk goraýjy edaralary bilen bilelikde gurnamagynda “Ýaşlar – ýurdumyzyň ylmy kuwwaty“ atly baýramçylyk dabarasy geçirildi. Baýramçylyk dabarasynyň dowamynda institutyň Halkara ykdysady gatnaşyklary kafedrasynyň uly mugallymy Perhat Çaryýew, Türkmenistanyň Ýokary Kazyýetiniň Maglumatlar merkeziniň müdiri Süleýman Durdyýew, Türkmenistanyň Adalat ministrliginiň wekili Geldimuhammet Çaryýew, Aşgabat şäheriniň Köpetdag etrap kazyýetiniň administratiw we ýerine ýetiriş önümçiligi boýunça kazysy Atajan Rozyýew, TDIM-niň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň öwreniji mugallymy, “Ýaş alymlar geňeşiniň” başlygy Gülsenem Hommadowa, Aşgabat şäheriniň Berkararlyk etrap kazyýetiniň administratiw we ýerine ýetiriş önümçiligi boýunça kazysy Wepa Meredow, Türkmenistanyň Döwlet migrasiýa gullugynyň harby gullukçysy, maýor Remezan Gullyýew we TDIM HGI-niň Halkara hukugy fakultetiniň 4-nji ýyl talyby, Ýaş alymlar bäsleşiginiň ýeňijisi Hatyja Döwletnazarowa dagylar çykyş etdiler. Baýramçylyk dabarasynda çykyş eden myhmanlar Gahryman Arkadagymyzyň we hormatly Prezidentimiziň saýasynda ýurdumyzyň mundan beýläk-de ösmeginde ýaşlaryň orny barada gürrüň etdiler. Şeýle hem intelektual eýeçiligiň, ylmy işgärleriň hukuk ýagdaýlarynyň we döwlet kepillikleriniň orny, hukuk ylmynyň ösüşine ýaşlaryň goşýan goşandy barada aýdylyp geçildi. Dabaranyň ahyrynda myhmanlarymyz Türkmen halkynyň Milli Lideri Gahryman Arkadagymyza we Arkadagly Serdarymyza hoşallyk sözlerini aýtdylar. Baýramçylyk dabarasynda institutyň çeper höwesjeňler toparynyň ýerine ýetirmeginde aýdym-sazlar bilen utgaşmagy çykyşlaryň täsirliligini has-da artdyrdy.
Nurmyrat AZADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 3-nji ýyl talyby.