ÝAŞ MATEMATIKLERIŇ HALKARA DEREJEDÄKI ÜSTÜNLIKLERI
Türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň ýolbaşçylygynda ýurdumyzda amala aşyrylýan ýaşlar baradaky döwlet syýasatynyň esasy maksady ylymly-bilimli, sagdyn bedenli, watansöýüji ýaşlary ýetişdirmekden, olary ähtlitaraplaýyn goldamakdan ybaratdyr.
Berkarar döwletiň täze eýýamynyň Galkynyşy döwründe bagtyýar ýaşlar özleri hakynda edilýän ägirt uly aladalara jogap edip, hormatly Prezidentimiziň öňe sürýän başlangyçlaryny tüýs ýürekden goldap, halal zähmetleridir, ukyp-başarnyklary bilen ýurdumyzyň ösüşlerine öz goşantlaryny goşýarlar.
Ýakynda, has takygy Russiýa Fededrasiýasynyň Patris Lumumba adyndaky Halklaryň dostlugy uniwersitetinde 26-njy noýabr we 2-nji dekabr aralygynda Moskwa şäherinde ýokary okuw mekdepleriniň arasynda geçirilen matematika dersinden «RUDN MATH OLYMP» olimpiadasyna dünýäniň 13 döwletinden 35 sany ýokary okuw mekdepleriniň talyplary gatnaşdylar. Şol sanda, Türkmenistanyň 8 sany ýokary okuw mekdebinden 19 talyp bu ýokary derejedäki olimpiada gatnaşmaga hukuk gazandy. Şolaryň hatarynda, Türkmenistanyň Daşary işler ministrliginiň Halkara gatnaşyklary institutynyň uly mugallymy, fizika-matematika ylymlarynyň kandidaty Gaplaň Esenamanowyň ýolbaşçylygynda iki talypdan ybarat topar gatnaşdy. Halkara bäsleşigiň netijeleri boýunça Halkara ykdysady gatnaşyklary fakultetiniň talyplary Goçmyrat Penjiýew hem-de Bägül Hudaýberdiýewa III orna mynasyp boldular. Bäsleşik iki tapgyrdan ybarat bolup, şahsy we toparlaýyn tapgyrlarda geçirildi. Russiýanyň tebigy-syýahatçylyk we taryhy-medeni mümkinçiliklerini, rus milli däplerini hem-de olaryň özboluşlylygyny tanyşdyrmak maksady bilen gurnalan gezelençler bäsleşige gatnaşyjy daşary ýurtly talyplar üçin dünýäniň dürli ýurtlaryndaky deň-duşlary bilen dostlukly gatnaşyklary pugtalandyrmakda uly ähmiýete eýe boldy.
Halkara derejede uly sylaga mynasyp bolan talyp ýaşlar halypalaryň şägirtlerine siňdiren yhlasynyň netijesidir.
Ýaşlara uly ynam bildirýän, halypa-şägirtlik gatnaşyklaryna uly mümkinçilik döreden Gahryman Arkadagymyzyň, Arkadagly Gahryman Serdarymyzyň janlary sag bolsun, belent başlary aman bolsun. Ýaş metamikleriň üstünlikleriniň gadamlary batly bolsun!
Mährijemal MÄMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň uly mugallymy.