“Ýaş diplomatlaryň mekdebiniň” agzalarynyň arasynda okuw sapagy geçirildi
2024-nji ýylyň 20-nji dekabrynda Türkmenistanyň Daşary işler ministrliginiň Halkara gatnaşyklary institutynyň Ýaş diplomatlaryň mekdebiniň agzalarynyň gatnaşmagynda “Energetika diplomatiýasy” okuw merkezinde okuw sapagy geçirildi. Okuw sapagyny Türkmenistanyň Daşary işler ministrliginiň Halkara gatnaşyklary institutynyň mugallymy Perhat Mähremow alyp bardy. Okuw sapagy “Bitaraplyk syýasaty we daşary syýasatyň aýratyn taraplary” atly temadan geçirildi. Mugallym hemişelik Bitaraplygyň ýurdumyzyň daşary syýasatyna we beýleki halklar bilen gatnaşyklaryna nähili täsir edýändigi barada gürrüň berdi. Gatnaşyjylar hemişelik Bitaraplygyň taryhy we häzirki wagtda dünýä syýasatyndaky ähmiýeti bilen tanyşdylar. Bu okuw sapagy energetika diplomatiýasy we söwda bileleşikleri ýaly daşary syýasatyň aýratyn taraplaryny hem öz içine aldy.
Ýaş diplomatlaryň mekdebiniň agzalary okuw sapagyna işjeň gatnaşyp, hemişelik Bitaraplygyň halkara gatnaşyklarynda tutýan orny barada giňişleýin düşünje aldylar.
Seýitmuhammet GURBANGELDIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.