Ýaş alymlaryň ylmy bäsleşiginiň institut tapgyry geçirildi
Hormatly Prezidentimiziň taýsyz tagallalary bilen ýurdumyzda tejribeli hünärmenleri taýýarlamak, ýaşlaryň döredijilik ukybyny ýüze çykarmak, hemmetaraplaýyn ösen, öňdebaryjy nesli terbiýeläp ýetişdirmek babatda uly işler amala aşyrylýar. Bu babatda Gahryman Arkadagymyz “Bilim we ylym ulgamlarynda utgaşykly alyp barýan düýpli özgertmelerimiziň netijesinde, ylma hem-de döredijilige höwesli ýaşlarymyzyň täze nesli kemala geldi. Ýurdumyzyň akademiki ylmy-barlag institutlarynda, ýokary okuw mekdeplerinde, ylmy-tehnologik, ylmy-kliniki hem-de ylmy-taslama merkezlerinde, tejribe-önümçilik barlaghanalarynda, pudagara we pudaklaýyn ylmy edaralarda sazlaşykly ýola goýlan işler, gazanylýan üstünlikler munuň aýdyň mysalydyr” diýip belleýär. Bu ylym-bilim düzümleri ýokary okuw mekdeplerinde bilim alýan ýaşlaryň ylmy bähbitlerini hem-de başlangyçlaryny höweslendirmäge, olary ilerletmäge we durmuşa geçirmäge ýardam bermäge, halkara forumlara hem-de duşuşyklara, şol sanda daşary ýurtlarda geçirilýän çärelere gatnaşmaga we ýaşlary bilelikdäki taslamalary durmuşa geçirmäge gönükdirilendir. Her ýyl Türkmenistanyň Ylymlar akademiýasy, Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan geçirilýän ýaş alymlaryň ylmy bäsleşigi hem ýurdumyzyň ylmyna öz goşandyny goşjak ýaş zehinleri ýüze çykarmakda uly orun eýeleýär.
2023-nji ýylyň 13-nji fewralynda Türkmenistanyň Daşary işler ministrliginiň Halkara gatnaşyklary institutynda hem bu ylmy bäsleşiginiň institut tapgyry geçirildi. Bäsleşigiň institut tapgyryna institutyň ýaş mugallymlary we ähli hünärleri boýunça talyplary gatnaşdylar we özleriniň ýazan ylmy işleri bilen ýokary okuw mekdebiniň proffessor mugallymlaryndan düzülen toparyň öňünde çykyş etdiler. Toparyň agzalary tarapyndan mugallymlaryň we talyplaryň hödürlän ylmy işleriniň wajyplygy, derwaýyslygy täzeçilligi esasynda seljerilip birnäçesi Türkmenistanyň Ylymlar akademiýasy, Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan 2023-nji ýylda yglan edilen ýaş alymlaryň ylmy bäsleşigine hödürlendi.
Gülsenem HOMMADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň
Halkara hususy hukugy ugrunyň magistranty.