“ÝAŞ ALYMLAR GEŇEŞINIŇ NYŞANY” ATLY BÄSLEŞIGIŇ JEMI JEMLENDI
2024-nji ýylyň 11-nji martynda Türkmenistanyň Daşary işler ministrliginiň Halkara gatnaşyklary institutynda «Ýaş alymlar geňeşiniň» gurnamagynda bu ýokary okuw mekdebiň talyplarynyň arasynda yglan edilen “Ýaş alymlar geňeşiniň nyşany” atly bäsleşigiň jemi jemlendi.
Hormatly Prezidentimiziň ýolbaşçylygynda häzirki wagtda oýlap tapyşlary we beýleki ylmy-tehniki gazananlary peýdalanmagyň möhüm ähmiýeti, ylmyň önümçilik bilen ýakyndan arabaglanyşygyny ýola goýmagyň zerurlygy barada yzygiderli nygtalýar. Intellektual iş hem-de onuň netijelerini ornaşdyrmagyň meselelerini çözmekde möhüm serişdeleriň biri-de intellektual eýeçilik işine ýaşlaryň gatnaşmagyny üpjün etmek we höweslendirmek bolup durýar. Bu bäsleşik ýaşlaryň döredijilik ukyplaryny kemala getirmek we ösdürmek boýunça ýaşlaryň döredijiligini artdyrmaga, şeýle hem «Ýaş alymlar geňeşiniň» işini kämilleşdirmäge goşant goşýar.
Bäsleşige Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa, Halkara hukugy, Halkara ykdysady gatnaşyklary we Halkara žurnalistikasy fakultetleriniň talyplary işjeň gatnaşdy we bäsleşigiň talaplaryna laýyk ugradylan nyşanlar institutyň sanly bilim portalynda ýerleşdirilip professor-mugallymlaryň we talyp ýaşlaryň sesleriniň netijesi boýunça ýeňiji yglan edildi.
Netijede bäsleşige işjeň gatnaşandygy üçin Halkara ganaşyklary we diplomatiýasy fakultetiniň talyby Selbi Muhammedowa, Halkara hukugy fakultetiniň talyplary Mergen Gurdow, Eziz Mämmedow we Şyhmämmet Mämmetamanow, Halkara žurnalistikasy fakultetiniň talyplary Berdigylyç Ýazmyradow we Aýlar Sadykowa Minnetdarlyk hatyna mynasyp boldular. Bäsleşigiň ýeňijisi Halkara ykdysady gatnaşyklary fakultetiniň talyby Erem Döwletmyradow Hormat hata we «Ýaş alymlar geňeşi» tarapyndan sowgada mynasyp boldy. Onuň döreden nyşany «Ýaş alymlar geňeşiniň» nyşany diýip yglan edildi.
Biz ýaşlar üçin okamaga, öwrenmäge, döretmäge ajaýyp mümkinçilikleri döredip berýän Gahryman Arkadagymyza, Arkadagly Gahryman Serdarymyza köp sag bolsun aýdýarys. Türkmen halkynyň milli Lideri Arkadagymyzyň, Arkadagly Gahryman Serdarymyzyň janlary sag, ömürleri uzak bolsun, il-bähbitli, ýurt ähmiýetli alyp barýan tutumly başlangyçlary hemişe rowaçlyklara beslensin!
Kerem ALLABERDIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.