Ýaponiýaly diplomatyň ýaş žurnalistler bilen duşuşygy
Hormatly Prezidentimiziň parasatly baştutanlygynda ýurdumyzyň daşary syýasat ugry dünýä ýurtlary bilen dürli ugurlarda özara bähbitli hyzmatdaşlyk gatnaşyklaryny ösdürmäge gönükdirilendir. Bu ugurda Aziýa – Ýuwaş ummany sebitiniň ýurtlary, hususan-da, Ýaponiýa bilen gatnaşyklar hil taýdan täze derejelere çykýar. Esasan hem dostlukly Ýaponiýa döwleti bilen söwda-ykdysady gatnaşyklar, ynsanperwer ugurlarda, ylym-bilim pudagyndaky hyzmatdaşlyklar barha ösdürilýär.
Munuň bilen baglanyşykly, 2022-nji ýylyň 15-nji aprelinde Türkmenistanyň Daşary işler ministrliginiň Halkara gatnaşyklary institutynda Türkmenistan bilen Ýaponiýanyň arasyndaky diplomatik gatnaşyklaryň ýola goýulmagynyň 30 ýyllygy mynasybetli Ýaponiýanyň Türkmenistandaky Adatdan daşary we Doly ygtyýarly ilçisi Hiroýuki Ýamamoto bilen institutyň Halkara žurnalistikasy fakultetiniň talyplarynyň arasynda geçirilen duşuşygy aýtmak bolar.
Duşuşygyň barşynda ýaponiýaly diplomat iki döwletiň arasyndaky hyzmatdaşlygyň netijeli we strategik häsiýete eýedigini bellemek bilen, ykdysadyýet, bilim we ylym, hünärmenleri alyşmak we ýokary hünärli işgärleri taýýarlamak ulgamlary hyzmatdaşlygyň ileri tutulýan ugurlarynyň hatarynda durýandygyny nygtady. Hususan-da, türkmen-ýapon hyzmatdaşlygy diwersifikasiýalaşdyrmak hem-de ösdürmek bilen bagly özara gatnaşyklary işjeňleşdirmäge aýratyn ähmiýet berýändigini çykyşynyň dowamynda belläp geçdi.
Geljekki halkaraçy talyplar hormatly myhmana türkmen-ýapon gatnaşyklarynyň geljegi, saýlan hünär ugurlary bilen bagly özlerini gyzyklandyrýan sowallary bilen ýüzlendiler. Diplomatik gullugynyň baý tejribesine eýe bolan ilçi özüne berlen sowallara giňişleýin jogap bermek bilen, talyplara geljekki hünär ugurlarynda ýokary derejelere eýe bolmagyny, dostlukly döwletara gatnaşyklarynyň ösüşine öz şahsy goşantlaryny goşmagy arzuw etdi.
Gözel EMINOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.
Şeýle hem bu barada şu ýerden okap bilersiňiz!