Wodorod energetikasynyň ýol kartasyny taýýarlamak boýunça halkara maslahat
2022-nji ýylyň 11-nji maýynda Ýewropada Howpsuzlyk we Hyzmatdaşlyk Guramasynyň Aşgabatdaky wekilhanasynyň guramagynda wodorod energetikasynyň ýol kartasyny taýýarlamak boýunça okuw maslahaty geçirildi. Belarus Respublikasynyň öňdebaryjy alymlarynyň gatnaşmagynda geçirilen bu okuw maslahatyna ýurdumyzyň ministrlikleriniň we pudak edaralarynyň wekilleri bilen birlikde Türkmenistanyň Daşary işler ministrliginiň Halkara gatnaşyklary institutynyň mugallymlary hem gatnaşdylar.
Maslahatda wodorod energetikasynyň dürli pudaklarda ulanylyşynyň ösüşi, wodorod energetikasynyň ykdysady-tehniki çäkleri, energiýa ulanyşyny düzgünleşdirmekde wodorod ulanylyşynyň netijeliligi, wodorod energetikasynyň ykdysadyýete täsiri, dünýä bazarynda ösüşiniň seljermesi ýaly ylmy meselelere seredildi. Wodorod energetikasy, ýurtlar boýunça wodorod strategiýasynyň seljermesi we Merkezi Aziýadan wodorody eksport etmegiň esasy ugurlary boýunça wodorod energetikasynyň netijeli ösüşiniň meseleleri ara alnyp maslahatlaşyldy.
Maslahatyň ahyrynda bilermenler ýurdumyzda wodorod energetikasyny ösdürmäge uly mümkinçilikleriň bardygyny nygtamak bilen, bu işde hormatly Prezidentimiziň alyp barýan döwlet syýasatynyň ähmiýetine hem ýokary baha berdiler.
Akgözel RASULOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 2-nji ýyl talyby.