Ulag diplomatiýasy boýunça fakultatiw okuw sapagy
Häzirki döwürde Türkmenistanyň 2017–2023-nji ýyllar üçin daşary syýasat Konsepsiýasynyň esasy ugurlarynyň biri bolup, Ulag diplomatiýasy çykyş edýär. Hormatly Prezidentimiziň başlangyjy esasynda Türkmenistanyň Daşary işler ministrliginiň Halkara gatnaşyklary institutyndaky Türkmenistanyň diplomatiýasynyň möhüm ugurlary boýunça okuw merkezinde «Ulag diplomatiýasy» ugruna degişli ýörite tassyklanan okuw meýilnamasyna laýyklykda fakultatiw okuwlar ýokary derejede geçirilýär.
2021-nji ýylyň 17-nji dekabrynda Türkmenistanyň Daşary işler ministrliginiň Halkara gatnaşyklary institutyndaky okuw merkeziniň «Ulag diplomatiýasy» ugry boýunça nobatdaky fakultatiw okuw sapagy geçirildi. Okuw sapagynda institutyň Jemgyýeti öwreniş ylymlary kafedrasynyň uly mugallymy Täçnabat Paýtykowa çykyş etdi. «Beýik Ýüpek ýolunyň ugrundaky taryhy we häzirki zaman ulag diplomatiýasy» atly tema boýunça diňleyji talyplaryň arasynda geçirilen özara çekişme sapagy täsirliligi bilen tapawutlandy.
Şeýle-de okuw sapagyň çäklerinde Türkmenistanyň Demokratik partiýasynyň döredilmeginiň 30 ýyllygy mynasybetli Türkmenistanyň Daşary işler ministrliginiň Halkara gatnaşyklary institutynyň talyplaryna Türkmenistanyň Demokratik partiýasynyň agzalyk biletleri gowşuryldy.
Ýupar EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň 1-nji ýyl talyby.