Türkmenistanyň «Watana bolan söýgüsi üçin» medalynyň eýesi
— «Pähim-paýhas ummany Magtymguly Pyragy» ýylynda mukaddes Garaşsyzlygymyzyň 33 ýyllyk toýunyň toýlanýan günlerinde maňa Şa serpaýyna mynasyp bolmak bagty miýesser etdi. Hormatly Prezidentimiziň Permany bilen, Türkmenistanyň «Watana bolan söýgüsi üçin» medalynyň gowşurylmagyna çäksiz begenýärin. Meniň uly bolmadyk zähmetime Gahryman Arkadagymyzyň, Arkadagly Gahryman Serdarymyzyň berýän ünsi, bahasy başymy göge diredýär.
Meniň edebiýat mugallymy, edebiýaty öwreniji alym bolanym üçin, 2024-nji ýylyň «Pähim-paýhas ummany Magtymguly Pyragy» diýlip atlandyrylmagyna begenjimiň, buýsanjymyň çägi bolmady. Magtymguly Pyragy ajaýyp şahyr, akyldar, dana, filosof, pähim-paýhasy özünde jemleýän beýik şahsyýetdir. Gahryman Arkadagymyzyň belleýşi ýaly, onuň pikir-garaýyşlary, öwüt-ündewleri halkymyzyň durmuş ýörelgesi we pelsepesidir.
Gahryman Arkadagymyzyň, Arkadagly Gahryman Serdarymyzyň uly tagallalary bilen parasatly şahyryň edebi mirasyny öwrenmek we wagyz etmek işleri diňe bir ýurdumyzda däl, eýsem, dünýä ýüzünde giň gerimde alnyp barylýar. Dana şahyrymyzyň 300 ýyllyk toýunyň giňden bellenmegi oňa goýulýan sarpanyň nyşanydyr. Türkmenistanyň Garaşsyzlygyna eýe bolmagy bilen, beýik akyldaryň özbaşdak döwlet gurmak, halkymyzyň asuda we abadan durmuşy baradaky arzuwlary hasyl boldy.
Ömrümiň şeýle begençli pursadynda ýurdumyzy ösüşleriň täze belentliklerine tarap ynamly öňe alyp barýan Gahryman Arkadagymyza, Arkadagly Gahryman Serdarymyza köp sagbolsun aýdýaryn. Türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň janlary sag, belent başlary aman bolsun, tutumly işleri mundan beýläk hem rowaçlyklara ýar bolsun!
Baba SARYÝEW,
Türkmenistanyň Daşary işler ministrliginiň
Halkara gatnaşyklary institutynyň žurnalistikanyň nazaryýeti
we amalyýeti kafedrasynyň uly mugallymy,
filologiýa ylymlarynyň kandidaty,
Türkmenistanyň «Watana bolan söýgüsi üçin» medalynyň eýesi.