Türkmenistanyň Mejlisiniň deputatlygyna dalaşgärler bilen duşuşyk geçirildi
2024-nji ýylyň 12-nji iýunynda Türkmenistanyň Daşary işler ministrliginiň Halkara gatnaşyklary institutynda Aşgabat şäheriniň 1-nji «Garaşsyzlyk» saýlaw okrugy boýunça Türkmenistanyň Mejlisiniň deputatlygyna dalaşgärler bilen duşuşyk geçirildi.
Mälim bolşy ýaly, Türkmenistanyň Mejlisiniň 2024-nji ýylyň 20-nji aprelindäki Karary esasynda şu ýylyň 7-nji iýulynda Mejlisiň möhletinden öň çykyp giden deputatlarynyň ýerine saýlawlar geçirilýär. Şunuň bilen baglylykda, hasaba alnan dalaşgärler bilen saýlawçylaryň duşuşyklary guramaçylykly ýagdaýda dowam edýär.
Häzirki wagtda 1-nji «Garaşsyzlyk» okrugy boýunça dalaşgärleriň 3-si hasaba alyndy. Duşuşykda Türkmenistanyň Mejlisiniň deputatlygyna dalaşgär Dürli Allamyradowna Öwezowa özüniň maksatnamalary bilen çykyş etdiler hem-de saýlawçylar bilen sorag-jogap alyşdy.
Duşuşyga Aşgabat şäheriniň 1-nji «Garaşsyzlyk» okrug saýlaw toparynyň agzalary, okrugyň düzümindäki uçastok saýlaw toparlarynyň agzalary, institutyň professor-mugallymlary, talyplary gatnaşdylar.
Güljemile DÄDEBAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.